صبا اکبر آبادی(مرحوم)
پیش نگاہ خاص و عام شام بھی تو سحر بھی تو
جلوہ طراز ادھر بھی تو روح نواز ادھر بھی تو
ایک نگا ہ میں جلال ایک نگاہ میں جمال
منزلِ طور پر بھی تو مسندِ عرش پر بھی تو
عجز و نیازِ بندگی تیری نوازشوں سے ہے
حاکمِ ہر دعا بھی تو بارگہِ اثر بھی تو
پردۂ شب میں ہے نہاں نورِ سحر سے ہے عیاں
آپ ہی پردہ دار بھی آپ ہی پردہ در بھی تو
تیرا عروج سرمدی تیرا بیان زندگی
رفعتِ لامکاں بھی تو عظمتِ بام ودر بھی تو
تو ہی ہے کائناتِ راز توہی ہے رازِ کائنات
تو ہی ہے محیطِ ہر نظر مرکزِ ہر نظر بھی تو
بندہ ترا نثار ہے ذات و صفات پر تری
قلب صبا بھی تو ہی تو جانِ دل و جگر بھی تو
