سعید احمد
ہوا کی قبر میں زیاں کے ورق پر تحریر احساس
اداسی ہمکتی رہے دل کی آ غوش میں
ہمالہ کی چوٹی پہ خیمے میں جلتی ہوئی آگ کی
قربتوں سے
خنک نا رسائی تلک
فاصلہ ایک پل سے زیادہ نہیں ۔۔۔۔
مگر ۔۔۔۔وہ ۔۔۔۔۔!
ابھی تک جو میری صراحی کا بادہ نہیں
اُسے کون سے لفظ کی لکنتوں کی گرہ کھول کر
ایک بے نام سے نام ہی سے پکاروں ۔۔۔
مگر ۔۔۔۔۔۔!
یہ اندیشۂ عمرِ لاانتہا کے گذشتہ کی سل ۔۔۔۔۔
[وراثت میں آئی جو معلوم شجرے سے پہلے کہیں]
غار کے منہ سے ہٹتی نہیں
گئے عہد کی نیکیاں۔۔۔۔؟
یا د کی شاخ سے جھڑ چکیں
ورنہ یوں ہی دعائیں
فقط رائگانی کا سندیس لے کر
فلک سے پلٹتی نہیں ۔۔۔۔۔۔۔۔
