سعید احمد(راولپنڈی)
دھند میں سوئے ہوئے دن
کہر میں جاگی ہوئی راتیں
سفر کی خواب ہیں
خواب ہیں جن میں
کسی سورج ، کسی بھی چاند کی
مبہم سی کوئی آ س تک روتی نہیں
آ سماں کی دائمی نیلاہٹوں کے وصل کی
خواہش کبھی ہوتی نہیں
خواب ہیں ٹوٹی ہوئی ہر دائرے کی گردشیں
دیوار سے دیوار تک ساری حدیں
خواب ہیں کچھ راستے
[ آسودگی کی گھاس میں لپٹے ہوئے
آہستہ رو قدموں
کے ہلکے لمس کی سر شاریوں کے منتظر ]
او ر ہم تم ۔۔۔۔۔۔۔
بے خودی کی لہر میں گم
وقت کے اڑتے پرندے کو
گرہ میں باندھ کر چلتے رہیں
۔۔۔۔۔۔۔۔چلتے رہیں
۔۔۔۔۔۔۔۔چلتے رہیں
