کاوش عباسی(کراچی)
کیا؟
نا۔زندگی
ایک شئے مَوت کیدُھند سی
زندگی کہہ کے ہم جو جئے جا رہے ہیں
کوئی کواب کیا اس میں رکھیں
اُمنگوں کا کیا کوئی پیکر بُنیں
وہ جو ملتا تھا اور اب نہیں ملتا ہے
اُس کی کیا آگ دل میں بھریں
جس سے لڑنا تھا اور لڑ نہ پائے
خلاف اُس کے چھوٹے بنے
اُس لڑائی کا اندر کا خوردہ کہاں جا کے پھینکیں
کہیں کیا کچھ اعجاز سا ہو
جو دیکھیں تو لہکیں
جو سُن لیں تو چہکیں
جو چھو لیں تو دہکیں
جو پی لیں
تو جی لیں!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ جو کھونا ہے
وہ جو کھونا ہے،کھویا نہیں جا رہا
اور جو پانا ہے پایا نہیں جا رہا
بیچ میں مَیں اکیلا،بہت ہی اکیلا
عذاب اور خطرات میں خالی ہاتھ آدمی
ذات اور زیست کے نقشۂ سبز میں کانٹے اُگتے ہوئے
بد دعاؤں کی سانسوں کے تِیروں کے سائے میں
دُور،ایک شفّاف،اَبیض،محبت محل پر پہنچنے کو
مَیں آگے بڑھتا ہوا
کہیں موت کی دوسروں کی خبر
اور کہیں اکثر اپنی
قدم کانپتے،ہاتھ تو جیسے ہوں ہی نہیں
اور دل
لُوٹ کے بعد دہلا ہوا
جی نہ سکنے سا جیتا ہوا
جانے کیا سوچتا،
جانے اس کے مقدر میں کیا آگے لکھا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صبحِ صادق
کیا ہے یہ
آج کل جانے کیوں
پھوٹتی صبح بھی رات سی مجھ کو لگتی ہے
پَو پھٹے تو نیا دن نہیں،پھر وہی رات ہوتی ہے
میں واقعی جیسے
اک رات سے دوسری رات سے تیسری رات۔۔۔
میں ڈوبا جاتا ہوں
یہ چند لمحے اٹل کتنے لگتے ہیں
کب صبح صادق مِری آئے گی
میرے سورج،
مرے دن کے پُ زندگی شور میں مجھ کو نہلائے گی؟!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک لوک دُھن
سے متاثر ہو کر
دُور، تنہا، اُداس وادی میں
بیکراں خامشی میں عالَم کی
ایک آبادی اپنے آپ میں گم
اپنی پرچھائیوں میں لپٹی ہوئی
زار و ویران و بیکس و گمنام
زندگی اک عجیب عاجز جِنس
جاں کے بے ربط سلسلوں میں رواں
ابتدا کی خبر نہ آخر کی
فقط اک دائرہ سسکتا ہوا
ہست و بود و جمود و عسرت کا
ذہن لپکے پہ ٹوٹ کر رہ جائے
چیخ اُبھرے پہ ڈُوب کر رہ جائے
