تنہا تما پوری(تما پور)
مراجعت
میں زندہ تھا
تو……
قسطوں میں مجھے
مرناپڑا ہر دم!
کبھی بیوی کی خاطر
اور کبھی اولاد کی خاطر
کبھی مرمرکے برسوں میں نے
اپنا گھر سنوراتھا
میں زندہ تھا تو قسطوں میں
مجھے مرنا پڑا ہر دم!!
میں ان سب کیلئے بے چین
پھر سے لوٹ آیا ہوں
بظاہر بے بدن ہوں میں
بھٹکتی روح لایا ہوں۔
میں اپنے گھر کے سب بیدار کمرے جھانک آیاہوں
کس کمرے میں میری یاد کا منظر نہیں باقی
میری باتوں کی اس گھر میں کوئی آہٹ نہیں زندہ
کسی کے دل میں میرے نام کی گھنٹی نہیں بجتی
اسی گھر میں کبھی میں تھا، نشانی تک نہیں ملتی
میں شائد:
اپنے گھر کا راستہ ہی بھول بیٹھا ہوں…………
یہ میرا گھر نہیں ہے، میں پرائے گھر میں آیا ہوں……
حقیت میں
ابھی……کچھ دیر پہلے مرگیاہوں میں !!!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہمارا رشتہ
عدد ہوں میں
صفر ہوتم
ہمارا ایک رشتہ ہے۔
مجھے بھی دس گنا آگے نکلنے کی ضرورت ہے۔
تمھیں بھی اپنی قیمت کو
متعین کرکے جینا ہے
اکیلا ہو صفر
اسکی کوئی قیمت نہیں ہوتی
اگر بھولے سے بھی بائیں طرف
تم نے قدم رکھا
تو …… قیمت کھوگئی ساری
عدد ہوں میں، صفر ہوتم
ہمارا ایک رشتہ ہے
میری دائیں طرف تم کو
مقام اپنا بنانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آندھی، تنکے ،آشیاں
نیند سے میری ملاقات
ابھی ہوکہ نہ ہو
کیاخبر
آج کی یہ رات کٹے یا نہ کٹے
مقتل شب کی طرف
جاتے ہوئے خوابوں کو
راس آئی نہیں شاید
مری یہ تیرہ شبی
مری جاگی ہوئی آنکھوں میں
سلگتے رہے گھاؤ
میں تہی دست ہوں
خوابوں کا خریدار کبھی بن نہ سکا
میں کبھی اپنی ہتھیلی میں
ہنسی رکھ نہ سکا
میری تقدیر کو راحت کی مہک
چھونہ سکی
نیند سے میری ملاقات کا طحہ گم ہے
صبح کی
پہلی اذان
کون سنائے گا مجھے!!!؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈستے لمحے
کمرہ بھیڑ بھرا تھا لیکن
اک لمحے میں
دونظریں جب ٹکرائیں تو
یوں کوئی تھیں
جیسے بھیڑ بھرے کمرے میں
وہ تنہاہوں!
ایسے لمحے جب آتے ہیں
تب کچھ ایسا ہوجاتاہے
اپنا سب کچھ کھوجاتاہے۔
کوئی
ان لمحوں کو جب بھی
کھودیتاہے
اکثر خودکو ان لمحوں سے ڈسواتاہے
یوں جیون بھر پچھتاتاہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آخری سفر
جب سے میں پیدا ہواہوں
تب سے مجھ میں جنم لے کر
جاگتی رہتی ہے موت!!
میری سانسوں میں سفر کرتی ہوئی
دم بدم اِن دھڑکنوں کے ساتھ ہی چلتی ہوئی
اس کے جیسا ساتھ دینے والا اور کوئی قربت کو
میرے دل نے موت کی قربت کو
سوچاتک نہیں
اس کو میری زندگی نے پیار سے دیکھا نہیں
میں نے اسکی یاد کوخود میں کہیں ٹانکا نہیں
پھر بھی اس نے ایک پل مجھ کو کبھی چھوڑا نہیں
منہ سے کچھ بولا نہیں!!!
آج اچانک اس نے
پہلی بار مجھے سے یوں کہا!
میں تیرے ہمراہ چل کرکھو چکی اپنا سفر
اب تجھے اپنے سفر پرساتھ لے کر جاؤں گی
اک نئی دنیا تجھے دے کر
جدا ہوجاؤں گی…… !!!
