تنہا تما پوری(تماپور)
میاں ہوش میں ہو؟
زمیں پر ہو تم
یاخلاء میں کھڑے ہو
میاں ہوش میں ہو!!؟
زمین جب ہنسے گی
ہنسی دور تک زلزلہ جب بنے گی
خدا کی زمیں کو زباں جب ملے گی
کہاں اور کب تم نے کیا کیا کیا تھا
بتانے لگے گی
یہ ہاتھ اور پاؤں، یہ کان اور آنکھیں
زمیں کی گواہی کو تفصیل دیں گے
تم اپنی صفائی میں کیا کہ سکو گے؟
خدا کی عدالت سے کیسے بچو گے؟
زمیں پر ہو تم
یا خلاء میں کھڑے ہو
میاں ہوش میں ہو!!!؟
۔۔۔۔۔۔۔۔۔۔۔۔۔۔۔۔۔۔۔۔۔۔۔
شاید
یہ دن، ہفتے، مہینے، سال
کیلنڈر کے قیدی ہیں
ورق بدلا، مہینہ کھوگیا
کس بانجھ دھرتی میں
بس اک درجن ورق جب
پھڑ پھڑا کر ہوگئے مردہ
تو اس دیوار پر
ایک اور کیلنڈر طلوع ہوگا
نیا اک سال پھر سے اپنی سانسیں
گن رہا ہوگا۔
مری دیوار کتنے سال کھوکر
آج بھی چپ ہے
میرے جیون کا ہر اک سال
شائد مجھ میں زندہ ہے
۔۔۔۔۔۔۔۔۔۔۔۔۔۔۔۔۔۔۔
ایک ٹکڑا روٹی کا
ہوئے دو دن مرے چولہے نے
آنکھیں تک نہیں کھولیں
دھواں پلکیں نہیں جھپکا
نہ چنگاری کوئی بولی
فقط ہانڈی کا پانی گھرگیا ہے پیٹ میں میرے!!
وفاداری کے آنگن میں
اُگی آواز۔۔ ’’بھوں بھوں‘‘۔ کی …………
اُٹھا، غصے سے چپل میں نے اس آواز پر پھینکی
کہیں سے سو کھی روٹی وہ
اٹھالایا تھا کھانے کو
اسی روٹی کا اک ٹکڑا
گراتھا میری چپل پر
اسی ٹکڑے کو ہاتھوں میں لئے ٹہراہواہوں میں
مگر کیوں پیٹ کے اندر سے پانی بڑبڑاتا ہے
میرے ہاتھوں میں اس روٹی کا ٹکڑا کیوں لرزتاہے
۔۔۔۔۔۔۔۔۔۔۔۔۔۔۔۔۔۔۔۔
پانچ پڑوسی
کان اور آنکھ
ناک اور اک جیبھ
لمس کے ساتھ
مل کے رہتے ہیں
اپنے کاموں میں کس قدر مصروف
کیسے بے مثل یہ پڑوسی ہیں
اپنی اپنی حدیں سمجھتے ہیں
ایک دوجے کے کام میں ہر گز
دخل دیتے ہیں اور نہ لڑتے ہیں
یہ بدن مملکت میں رہتے ہیں
امن اور چین کا نمونہ ہیں۔
جائے عبرت ہے آدمی کیلئے
آدمی آدمی سے لڑتاہے
بے حیائی کی موت مرتاہے!!!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایسے بھی دن آئینگے
کچھوا پہلے یا خرگوش
بہت پرانا قصہ ہے
اب ہررستے پر بہتی ہیں
قسم قسم کی کئی گاڑیاں
رستوں پرادنیٰ سا ٹکڑا
خالی کہیں نہیں ملتاہے
ٹرافک کے اس شور میں لیکن
میری ساتھی
گاڑی میں ہے۔
میں پیدل ہی چلا نکلاہوں
ہم دونوں کی منزل ایک
دونوں کی رفتار الگ
حیرت ہے، منزل پر پہلے
مجھ جیسا کھچوا پہنچاہے
گاڑی کاخرگوش ابھی تک
رستے میں ہے!!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تقدیر
لفظ ’’بھوک‘‘ لکھی
اورچلی گئی
محنت کے نوالوں پہ
طمانچہ تھاوقت کا
اور پیٹ اس ہتھیلی میں
کشکول بن گیا!!
۔۔۔۔۔۔۔۔۔۔۔۔۔۔۔۔۔۔۔۔
رخسار ہٹالو
ابھی میت میں
تعزیت کی خاطر
آگئی ہوتم
دکھاوے کیلئے ہی کیوں نہ ہو
آنسو بہانا ہے
بس اتنا یاد رکھو
تم اپنے رخسار ہٹالو
ورنہ یہ میک اپ بگڑے گا!
