جمیل الرحمن(ہالینڈ)
میں۔جو کہیں رکتا نہ تھا
اپنی ہی پلکوں تلے ۔۔۔۔۔۔۔۔۔پھیلے ہوئے
صحرائے خود آزار کی ۔۔۔۔۔۔آتش نگاہی جھیلتے
پیاس کی خندق کو پاٹا ۔۔۔دھوپ سے آگے چلے
زندگی تھی جب سراپا عشق ۔۔۔۔۔۔کیا تھے حوصلے
اسباب جاں تھا دوش پر ۔ ۔۔۔تھا وہم ناکامی نہ ڈر
لیکن تھکن کا ایک پل ۔۔۔غافل ۔۔غنودہ ۔۔مختصر
کوندا لہو میں اس طرح میرے جنوں کو ۔۔۔ڈس گیا
میں جو کہیں رکتا نہ تھا۔۔۔اک دن کھنڈر میں بس گیا!
۔۔۔۔۔۔۔۔۔۔۔۔۔۔
۔۔اے زندہ آدمی
دہشت اور تباہی کے اس پل
جب گھوڑوں کو سرپٹ دوڑاتے
فاتح نیزہ بازوں کی آوازیں
ہاری ہوئی بستی میں گونج رہی ہیں
ٹوٹے ہوئے مکانوں کی اکھڑی دہلیزوں پر
اپنے ہی لہو میں لتھڑی عورتیں
اپنے سروں میں خاک بکھیرے
اجڑے ہوئے برہنہ پیڑوں کی تمثیل بنی
خاموش کھڑی ہیں
دھوپ میں کھلتی تاریکی سے لپٹے چاند کی آنکھوں میں
ان سورماؤں کے عکس اتر آئے ہیں
جن کے وجود اپنی کم حوصلہ زندگیوں کے ساتھ
وہ قول بھی ہار گئے ہیں
جن کی گواہی کی بنیاد پر ان کے گھروں میں
سکھ اور آسائش کے دیپ جلے
جن کے بخشے ہوئے یقین کی شہ پر
وصل و وفا کے پھول کھلے
اور ان کے سروں پر آسمان نے
اپنی رحمت کی ہرچادر تانی
اپنی آخری سانس سمیٹ کے چلتے ہوئے
اے زندہ آدمی
اس جانب مت دیکھ
کہ تیری موت مری زمیں کی موت ہے
کیونکہ تیرے بعدیہاں پانی برسے گا
پھول کھلیں گے
فصل اگے گی اور نہ کوئی قول دیا جائے گا
سو ۔۔اب جیسے بھی ممکن ہے
اپنی ہتھیلیاں پھیلا کر
تُو سر پر گرتے آسمان کو ان پر روکنے کی کوشش کر
اور ہوا پر اپنے قدم جمانے کی تمہید اٹھا
کیونکہ دہشت اور تباہی کے
اس پل
جب گھوڑوں کو سرپٹ دوڑاتے
نیزہ بازوں کی آوازیں
ہاری ہوئی بستی میں گونج رہی ہیں
صرف ہوا کو اپنے بس میں لا کر ہی ۔۔تُو
جی سکتا ہے۔۔۔۔۔۔۔۔۔۔۔۔!!!!
۔۔۔۔۔۔۔۔۔۔۔۔۔۔۔۔۔۔۔۔
سو بات ٹھہری یہی عرصہ گاہ الفت میں!
دل تباہ کی تسکیں،فضائے جاں کے لئے
نشاط فردا کی خاطر۔۔غم جہاں کے لئے
وہ سارے خواب مہ و سال کی امانت ہیں
وہ سارے خواب جو دیکھے ہیں تیری نسبت سے
وطن سے دور ۔۔۔۔بہت دور دشت غربت میں
بھٹکتے قدموں پہ جن کی بنت کی راہ کھلی
خماربادہ و آغوش مہ وشاں میں جنہیں
جنم جنم کی اذیت سے ۔۔کچھ نجات ملی
وہ سارے خواب جو دیکھے تھے تیری نسبت سے
وہ سارے خواب سر لمحہ ء قیامت ہیں
فضا میں گونج رہی ہے کوئی صدائے بگل
نکل گئی ہے بدوش ہوا نجانے کدہر
وہ رہ جوروٹھے ہوئے وحشیوں کو گھر لائے۔۔۔۔!
سو بات ٹہری یہی عرصہ گاہ الفت میں
کہ ترک خود کا ہنر ہو کہ ہو وہ کوئی چلن
ہر ایک لمحہ نئے خواب بنتے رہنے کا
کوئی ضرور نہیں سب کو راس آ جائے۔۔۔۔۔۔!
۔۔۔۔۔۔۔۔۔۔۔۔۔۔۔۔۔۔۔
جہاں انا کی کوکھ
سے خوف جنم لے
ہوا نے ۔۔۔۔۔۔۔۔۔جتنے دائرے کھینچ دئے ہیں
ان میں رہنا ہی۔۔۔۔۔۔۔۔۔۔۔۔۔۔بہتر ہے
ظاہر اور باطن کی گونجتی لے پر۔۔۔۔۔۔۔۔۔اٹھتے
تیز قدم پر۔۔۔۔۔۔۔۔۔۔۔۔۔۔گھوم کے دیکھو
آدمی ۔۔۔۔۔۔۔۔سب کچھ اپنے لئے ہی کرتا ہے
کوئی بھی۔۔۔۔۔۔۔۔۔۔۔۔۔۔۔۔خاکہ کھینچے
اسے ۔۔۔۔۔۔۔ وہ اپنے ہی رنگوں سے بھرتا ہے
میرے لئے تو ظاہر اور باطن میں کوئی فرق نہیں ہے
ہاں۔۔۔۔۔۔۔۔۔ ۔۔اک خوف کاخوف ہے
جس کے سبب ۔۔۔دونوں ہی دھندلا جاتے ہیں
اسی لئے تو میں نے تمہیں۔۔۔۔۔۔۔۔۔۔ کہا نا!
ہوا نے جتنے دائرے ۔۔۔۔۔۔۔کھینچ دئے ہیں
ان کی گر فت میں رہنا ہی ۔۔۔۔۔۔۔ بہتر ہے
جب تک ہوا کے۔۔۔۔۔۔۔۔۔۔ ساتھ اٹھیں
اس کے دامن میں۔۔۔۔۔۔۔۔۔۔۔ ٹھہریں
بادل ۔۔۔۔۔۔۔۔روئے خاک پہ لہراتے ہیں
جہاں انا کی کوکھ سے ۔۔۔۔۔۔۔۔۔خوف جنم لے
ہوا کا دامن چھوڑ کے ۔۔۔۔۔۔۔۔۔۔۔۔۔بادل
سب کچھ کھو کر ۔۔۔۔۔۔۔۔۔۔۔۔۔۔پانی ہو کر
بہہ۔۔۔۔۔۔۔۔۔۔۔۔۔۔۔۔۔۔جاتے ہیں!!
۔۔۔۔۔۔۔۔۔۔۔۔۔۔۔۔۔۔۔۔۔
خاموشی کا سچ
اب مرے ہاتھ ۔۔۔۔۔۔۔۔
ترے جسم کے مابین وہ دیوار ہے خاموشی کی
ساعت قرب جسے توڑنے کی کوشش میں
خود سے بیزار ہوئی جاتی ہے۔۔۔۔۔۔۔!
لمحہء وصل ہی سب کچھ تھا اگر
پھر یہ تماشہ کیا ہے۔۔۔۔۔۔۔۔۔۔۔ ؟
روح میں ایسا تو سنّا ٹا نہیں تھا پہلے
اب یہ خاموشی ۔۔یہ قصّہ کیا ہے۔۔۔۔؟
یہ عجب خامشی ہے
جس کی دہلیز پہ تم
غیر سے وصل گذشتہ کے سبھی رنگ نظر میں بھر کر
وصل آمادہ ہو مجھ سے کہ نیا کوئی گل خواب کھلے
زندگی جس میں دھڑکتی ہو
وہ اک گوہر نایاب ملے
اور ہوا ہے کہ سنکتے ہوئے چلا تی ہے،
سر پٹختی ہے،فضا روندتی ہے،
شور قیا مت میں بدل جاتی ہے۔۔۔۔۔!
میں کہ اس شور میں جو حاصل خاموشی ہے
کھوج میں سچ کی ،
ترے اور مرے سچ کی
بہت دیر، بہت دور،لئے دیدہ ء نم
تیز قدم چلتا ہوں
تا کہ اس خامشی کا بعد کہیں تو طے ہو۔۔۔!
لیکن ایسے میں فقط اپنے لہو میں غلطاں
خواب آنکھوں میں ابھر آتے ہیں
اور مرے ہاتھ ،ترے جسم کے مابین اتر آتی ہے
سرد دیوار اسی خامشی کی
ساعت قرب جسے توڑنے کی کوشش میں
خود سے بیزار ہوئی جاتی ہے۔۔۔۔۔۔!!!!!!
