ناظم خلیلی
بہارِ موسمِ دل اُتنی زرنگار نہیں
کہ نخلِ چشم پہ اب بارِ یادِ یار نہیں
ہجومِ درد ،نہ آہ و بکا نہ یورشِ غم
دُکانِ عشق کھلی ہے پہ کاروبار نہیں
ہماری آنکھوں میں اُس چشمِ سُرمہ ساکی قسم
گزشتہ دور کی کرچیں ہیں،اب خمار نہیں
نہ آرزو ،نہ طلب،جستجو نہ شوقِ وصال
مگر یہ دل ہے کہ پھر بھی اسے قرار نہیں
کچھ ایسا ہو کہ ہر اک بات اَبکے اُلٹی ہو
وہ بار بار کہیں ہاں،میں بار بار نہیں
عجیب جا ہے یہ بازارِ دوستی کہ جہاں
ہر ایک جنس ہے پر جنسِ اعتبار نہیں
