بس لا تعلقی کی فضا درمیاں نہ ہو
نا مہرباں سہی تو اگر مہرباں نہ ہو
تو شکوۂ جفا سے مرے سرگراں نہ ہو
اب جی میں طے کیا ہے کہ منہ میں زباں نہ ہو
لوحِ جبیں اٹھائے رکھوں سر پہ کس لیے
سر تن پہ کیوں رکھوں جو ترا آستاں نہ ہو
حرص و ہوس کی راہ میں اف کارواں چلا
منزل کسے خبر ہے کہاں ہو کہاں نہ ہو
ملتا نہیں سراغ تری یاد کا ہمیں
چمٹی ہوئی ہی دل سے جو یادِ بتاں نہ ہو
اظہارِ غم کے واسطے آنکھیں ہی کیا ہیں کم
آزادیِ زبان و بیان و فغاں نہ ہو
جو دل میں رہ گئی تری حسرت نہ ہو کہیں
لب تک نہ آئی جو وہ تری داستاں نہ ہو
آتا نہیں ہے بزمِ سخن میں کوئی مزہ
جب تک نظرؔ تمہیں سا کوئی خوش بیاں نہ ہو
٭٭٭
