دل جس ﷺ سے زندہ ہے

جلوہ حُسن آفریں حُسن وجمالِ مصطفی
تاابد ہے مستقل جاہ وجلالِ مصطفی

شیفتہ خُدا ہوا وہ بخیالِ مصطفی
آیا جسے نظر کبھی حُسن وجمال مصطفی

راز شرفِ حضور کاکھُل نہ سکا بجرز خُدا
عرشِ علیٰ ہے زینہ اوجِ کمالِ مصطفی

رَوکشِ عرش ہے کبھی کعبہ بہ قلب ہے کبھی
خلوتِ دل ہے آج کل بزمِ خیالِ مصطفی

تابشِ مہر حشرمیں کام ہر اک کے آگئی
ابرِمراد بن گئی گردِ نعالِ مصطفی

اِس لئے ناپسند ہے مجھ کو جمالِ نجم وگُل
ہے مِرے چشم شوق میں حسن وجمال مصطفی

بابِ حرم پہ کیوں نہ ہو سر مِرا مائل سجود
جب ہمہ وقت ہی رہے دل میں خیال مصطفی
ہاشمی تاجدار کا ہاشم زار ہے غلام
حشر میں کام آئے گی اُلفتِ آل مصطفی