بری نظامی کی شاعری

نی عشق دے پچھے نہ پوہ سسیے اَتے چھڈ دے عشق دا کھیڑا
نی بالاں وانگر ضد نہ کر توں عشق دا راہ اے بھہڑا
او شِکر دوپیراں وانگ رولے اَتھے ماروں تھل دے پینڈے
بری نظامیؔ کہن سیانڑیں عشق دا روگ آویڑا

نی اُونٹھا ں والے ٹُر جانڑ گے فیر لبھدی پھریں گی ہانڑی
نی سسیے جاگدی رئیں راہ تجدی نیند نہ مانڑی

پیر پیر تے پہن پھلیکے اے ہے عشق دو آرا
توں الڑ مٹیار اَیانی تیرا روپ کنوارا
نی پھلاں جئے مکھڑے تے کتھے شِکر دوپہر نہ تانی
نی سسیے جاگدی رئیں راہ تج دی نیند نہ مانی
نی اُونٹھاں والے ٹُر جان گے

وچ چنہاں دے سوہنی ڈُب گئی رات کباباں والی
تیرے نال وی اِنج نہ ہووے رات شرابا ں والی
نی ویلا گیا ہتھ نہ آوے توُں ویلا آپ پچھانی
نی سسیے جاگدی رئیں راہ تج دی نیند نہ مانی
نی اُونٹھاں والے ٹُر جان گے

عشق دِی راہوں کھنجے جہڑے پیندیاں لمبیاں واٹاں
ہائے مرن تیکر نہ مگروں لیندیاں عشق دِیاں اِے چاٹاں
نی چھم چھم بدلاں وانگوں کتھے اَکھیاں وچ وس پئے نہ پانی
نی سسیے جاگدی رئیں راہ تج دی نیند نہ مانی
نی اُونٹھاں والے ٹُر جان گے

کُل بلائیں جنگل دیاں آ لاش سسی تے گئیاں
ویکھ کے لاش سسی دی کوں حیران کھلوندیاں رہئیاں
سسی آکھیا بیشک کھاؤ مینوں میں تاں دعوت دیندی پئیاں
پر دو اکھیں میریاں محفوط رکھا او راہ کیچ دا دیندیاں پیہاں