عکاس کولکاتہ ۸ جنوری ۲۰۲۳ء

ہم نے ہر بار محبت پہ ہیں وارے آنسو
کیا بجھائیں گے لگی دل کی یہ کھارے آنسو
راہ تکتے رہے تاعمر ہتھیلی کا تری
تھام کے پلکوں کا زینہ یہ بیچارے آنسو
لاج رکھنا تو مرے ضبط کی میرے مولا
ہار جائیں نہ کہیں ہجر کے مارے آنسو
ہم کو آیا نہیں اظہار تمنا کا طریق
ہم نے آنچل میں چھپا ڈالے کنوارے آنسو
اس طرح تو نہیں ہوتا ناں کبھی چاہت میں
میری آنکھوں میں امڈ آئیں تمہارے آنسو
زندگی درد میں ڈھلتی ہے تو پھر دیکھو نا
کر نہ پائیں کبھی شکوہ یہ بچارے آنسو
اشک پلکوں تلے چبھنے لگے سنگ ریزوں سے
کاش بہہ جائیں سکھی درد کے مارے آنسو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔