عکاس کولکاتہ ۸ جنوری ۲۰۲۳ء

دو وقت کی روٹی سے بھی انکار نہ کر
اور اس سے زیادہ کا طلب گار نہ کر
اچھا کہ برا ہوں ،تری دہلیز پہ ہوں
ٹھکرا نہ مجھے مجھ کو گنہگار نہ کر
تاخیر سے میں تیری طرف لَوٹاہوں
اک راندہ مسافر کو زیاں کار نہ کر
پھر مجھ کو سنبھل جانے کی مہلت دیدے
مولا کبھی نفرت سے مجھے پیار نہ کر
بے ستر ہوں لیکن مرا ستار بھی تو
رسوا مجھے یکسر سرِ بازار نہ کر
تو میرا معالج بھی مجھے لا حق بھی
تیرا ہوں کسی اور کا بیمار نہ کر
تو مجھ کو خرابی سے بچا سکتا ہے
مجھکو مرے ہاتھوں سے گرفتار نہ کر
جو کچھ بھی ہے مجھ میں تری توفیق سے ہے
اس خاک سے باہر مرا پندار نہ کر
اک آخری سجدے کی سہولت دے دے
شانوں پہ مرے سر کو گراں بار نہ کر
۔۔۔۔۔۔۔۔۔۔۔۔۔۔۔۔۔۔۔۔۔۔۔