عکاس کولکاتہ ۳ دسمبر ۲۰۲۳ء

ہم تجھے بھولنے والے تھے
تجھے بھول گئے ہوتے
کہ ہم زودفراموش کسی کو بھی بھلا سکتے ہیں
حافظہ اتنا سبک سر ہے کہ تا دیر اس میں
کوئی محفوظ نہیں رہ سکتا
ہم تجھے بھولنے والے تھے مگر
عہدِحاضر میں بھی ماضی کی طرح
شہر کی سرخ و سیہ سڑکوں پر
رنج اور کرب کی اڑتی ہوئی دھول
بھوک اور ننگ کی پھیلی ہوئی دھوپ
زندہ رہنے کے لئے مرتی ہوئی خواہش جاں
ناتوانوں پہ روا مشق ِستم
زیر دستوں پہ بہیمانہ کرم
جبر کے عہد سے جمہور تلک
خونِ عشاق وہی دامنِ صدچاک وہی
شب ِماتم بھی وہی شامِ غریباں بھی وہی
چاکِ داماں بھی وہی چاکِ گریباں بھی وہی
قیدوزنجیر وہی روزنِ زنداں بھی وہی
غمِ دوراں بھی وہی اور غم ِجاناں بھی وہی
خونِ یک رنگ وہی بارش ِصد سنگ وہی
جسمِ افلاس وہی پیرہن ِننگ وہی
وہی سب کچھ جو ترے عہد میں تھا آج بھی ہے
ملک اسی طرح سے آباد بھی تاراج بھی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔