عکاس کولکاتہ ۲۹ مئی ۲۰۲۲ء

ہوا کو لکھنا جو آ گیا ہے
ہوا کو لکھنا جو آ گیا ہے
اب اس کی مرضی کہ وہ خزاں کو بہار لکھ دے
بہار کو انتظار لکھ دے
سفر کی خواہش کو واہموں کے عذاب سے
ہمکنار لکھ دے
وفا کے رستوں پر چلنے والوں کی قسمتوں میں
غبار لکھ دے
ہوا کو لکھنا جو آ گیا ہے ۔۔۔۔
ہوا کی مرضی کہ وصل موسم میں ہجر کو حصہ دار لکھ دے
محبتوں میں گزرنے والی رُتوں کو نا پائیدار لکھ دے
ہوا کو لکھنا جو آ گیا ہے۔۔۔
اب اس کی مرضی ہے کہ ہمارے دئیے بجھا کر
شبوں کو با اختیار کر کے سحر کو بے اعتبار لکھ دے
ہوا کو لکھنا سکھانے والو !
ہوا کو لکھنا جو آ گیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔