عکاس کولکاتہ ۲۹ مئی ۲۰۲۲ء

لگا تھا یوں کسی اونچی اُڑان سے اترے
تصورات کے جب لا مکان سے اُترے
چمک کے خوشیوں کا سورج بھی تھک گیا آخر
اداسیوں کے نہ سائے مکان سے اُترے
شجر کی بانہوں میں سوئی ہوا کو مت چھیڑو
تھکن کا بوجھ تو کچھ جسم و جان سے اُترے
میں دیکھ تو لوں زمانے کے تیوروں کا رنگ
وہ اتنی دیر کو ہی میرے دھیان سے اُترے
یہ ایک آس بھی دَم توڑنے لگی اب تو
کہ معجزہ ہی کوئی آسمان سے اُترے
سنہرا چاند نگر ان کا منتہیٰ ٹھہرا
جو خواب اندھی شبوں کے جہان سے اُترے
انا یوں گھات میں بیٹھی رہے گی کتنی دیر
کبھی تو میرے بدن کی مچان سے اُترے
بلندیوں کی مسافت کا دَم نہیں مجھ میں
مِرے لیے کوئی چشمہ چٹان سے اُترے
تھی میٹھے زہر کی مانند گفتگو اب کے
عجیب ذائقے اس کی زبان سے اُترے
گلاب رُت میں بھی اتنی اُداسیاں فرحتؔ
تِرے لیے تو ارم آسمان سے اُترے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔