عکاس کولکاتہ ۲۸ جنوری ۲۰۲۴ء

ملا کمال تو سوچا زوال باقی ہے
یہ کس کمی کا مسلسل خیال باقی ہے
ابھی تو ہجر کے موسم گزارنے ہوں گے
ابھی تو پانچواں موسم ’’وصال‘‘ باقی ہے
وہ مان کر بھی نہیں بات ماننے والا
یوں لگ رہا ہے کہ اب تک ملال باقی ہے
وضاحتیں تو سبھی لاجواب ہیں تیری
مگر یہ ذہن میں رکھنا سوال باقی ہے
میں تجھ سے مل کے بھلا مطمئن رہوں کیسے
تری جدائی کا کچھ احتمال باقی ہے
ابھی تو صرف کہانی میں موڑ آیا ہے
کچھ اشک روک کے رکھنا مآل باقی ہے
ابھی تو دل کے فقط زخم ہی سلے ہیں صنمؔ
ابھی تو درد بھرا اندمال باقی ہے
۔۔۔۔۔۔۔۔۔۔۔۔۔۔۔۔۔۔۔۔