عکاس کولکاتہ ۲۶ جون ۲۰۲۲ء

واعظ ِ شہر کے اطوار بدلنے سے رہا
میں کسی شخص کا کردار بدلنے سے رہا
آپ کو ہونا پڑے گا ذرا اِن کا عادی
میں تو گھر کے درو دیوار بدلنے سے رہا
اب سفر سے تو یہ بہتر ہے کہ گھر میں بیٹھوں
قافلہ، قافلہ سالار بدلنے سے رہا
کتنے بدلے ہیں ترے حسن نے موسم لیکن
یہ ترا طالب ِ دیدار بدلنے سے رہا
بعض چیزوں کا بدلنا نہیں ممکن جیسے
آئینہ، آئینہ بردار بدلنے سے رہا
میں نے کوشش تو بہت کی ہے مگر خالد جی
کشش ِ درہم و دینار بدلنے سے رہا
۔۔۔۔۔۔۔۔۔۔۔۔۔۔۔۔۔۔۔۔۔۔