عکاس کولکاتہ ۲۴ ستمبر ۲۰۲۳ء

سراغِ درد نہیں، آدمی کدھر جائے
کوئی بتائے کہ یہ اجنبی کدھر جائے
سنا ہے نور کے غم میں چراغ جلتے ہیں
خوشی کی کھوج میں اب روشنی کدھر جائے
یہاں تلک تو کوئی خطرۂ فریب نہیں
نہ جانے موڑ کے آگے گلی کدھر جائے
کوئی تو ملکِ عدم کا پتہ ٹھکانہ ہو
کہ چھوڑ کر یہ نگر،زندگی کدھر جائے
مقامِ قلب و جگر یوں تو دیکھے بھالے ہیں
نہ جانے لے کے مِری عاشقی کدھر جائے
یہاں پہ ختم ہے سب انتقام دریا کا
کوئی بتائے کہ اب تشنگی کدھر جائے
جو غرقِ آب ہو منزل اسے ملے کیسے
تلاشِ بحر میں ساجدؔ ندی کدھر جائے
۔۔۔۔۔۔۔۔۔۔۔۔۔۔۔۔۔۔۔۔۔