عکاس کولکاتہ ۲۳ جولائی ۲۰۲۳ء

اتنی آسانی سے مشکل میں نہیں آئیں گے
غم زیادہ ہیں مرے دل میں نہیں آئیں گے
سر چھپائیں گے کہاں بھوک مٹائیں گے کہاں
سانپ چوہے کے اگر بل میں نہیں آئیں گے
سامنے آکے کرے وار مرے سینے پر
حوصلے اتنے تو قاتل میں نہیں آئیں گے
مجھکو دیکھے سے چھلک جاتی ہیں آنکھیں ان کی
وہ مرے سامنے محفل میں نہیں آئیں گے
حسن بے داغ ہے بے داغ رہے گا تیرا
عکس تیرے مہِ کامل میں نہیں آئیں گے
بد نظر والوں کے آسیب کبھی بھولے سے
تیرے ہونٹوں کے سیہ تِل میں نہیں آئیں گے
آپ کو کیسے ملے گا کسی بسمل کا شرف
آپ جب کوچۂ قاتل میں نہیں آئیں گے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔