الجھن بنے رہے تھے وہ جب تک شباب تھا
لپٹے کبھی وہ مجھ سے کبھی اجتناب تھا
گزرا کچھ اس طرح ہوں میں بحرِ حیات سے
موجوں کے دوش پر تو کبھی زیرِ آب تھا
ہم عرضِ حال کرنے کی جرات نہ کر سکے
وہ بھی نہ پوچھ پائے کہ مانع حجاب تھا
محرومیوں کی آگ میں جل کر ہوا ہوں راکھ
یہ روز روز جلنا بھی کتنا عذاب تھا
پہلے تو میر ا دل بھی دھڑکتا تھا خیر سے
پہلے تو میری آنکھ میں بھی ایک خواب تھا
اُس بے وفا کی اب بھی جوانی نہیں ڈھلی
اس گل بدن کا آج بھی چہرہ گلاب تھا
جو ڈوب کر بھی دے گیا رنگِ شفق سہیلؔ
تاریکیوں کے شہر کا وہ آفتاب تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
