عکاس کولکاتہ ۲۲ جنوری ۲۰۲۳ء

نیچر
وہ کچھ بھی کہیں۔۔۔۔آپ پر الزامات لگائیں،گالیاں دیں۔۔۔۔۔آپ اف تک نہیں کرتے ،جواب دینا تو دور کی بات ماتھے پر شکن تک نہیں لاتے۔۔۔۔حیرت کی بات ہے۔مجھے بڑی حیرانی تھی۔
وہ بولے نیچر خود اپنا انتقام لے لیتی ہے۔لے لے گی۔۔۔مجھے کچھ کہنے اور کرنے کی ضرورت نہیں۔۔وہ یہ کہہ کر خاموشی سے آگے بڑھ گئے۔
میں نے پکارا۔۔۔۔سنیں!۔۔۔۔وہ ایک لحظے کے لیے رکے
''ان کا سارا کاروبار تباہ ہوگیا اور ملاوٹ و غبن کے الزام میں ان کو پولیس پکڑ کر لے گئی''
وہ مڑے اور بولے۔''میں ایسا ہر گز نہیں چاہتا تھا ''
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بڑے بڑے ہاتھ
اماں تم۔مجھے عید پر نیا جوڑا پہناتی ہو۔نئے جوتے،جیب کے ساتھ بکسوئے سے جوڑا گیا رومال عطر، آنکھ میں سرمہ،بالوں میں تیل اور جیب میں کرارے نوٹ''
اماں بولیں ہاں تو میرا لال ہے ناں۔۔۔میرا دل کرتا ہے کہ پوری دنیا تیری جھولی میں لا کر رکھ دوں۔۔۔پگلے!
''اماں''
ہاں میرا پتر بول نا
مجھے وہ بڑے بڑے ہاتھ لادو جن کو تھام کر سب عید گاہ جاتے ہیں۔۔۔مجھے کوئی چیز نہیں چاہیے۔۔۔مجھے دنیا نہیں چاہیے۔۔۔ابا سے کہو اب سعودی عرب سے واپس آجائیں۔۔۔۔مجھے میرا ابا واپس دلادو۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔