عکاس کولکاتہ ۲۱ جنوری ۲۰۲۴ء

سات نظموں میں سے
پانچویں نظم
ہَوا میں شام کی ملگج
دلِ صدوہم میں خاموش ہلچل
اورشجر شاخوں میں سورج کا پیالہ
اپنی کرنیں سبز پتّوں کے لبوں میں قطرہ در قطرہ
انڈیلے جارہا تھا
اِدھراک کارکے شیشوں سے چپکی گہری چپ تھی
اور سماعت میں تسلسل سے ترنم اور تحت اللّفظ کا
آمیزہ، رس بن کر ٹپکتا جارہا تھا
ساز اور آواز کااِک عکسِ زرّیں تھا
جو سرسے پائوں تک اور دل سے دل تک، ہر رگِ جاں
میں اُترتا جارہا تھا
اِسی عالم میں صدیوں کی مسافت
گردشوں کی شال میں لپٹی کہیں اوندھی پڑی تھی
ایک مدہوشی مرے پہلو میں دھک دھک کررہی تھی
ایک مہتابی پیالے میں
کوئی شے تھی جو مجھ میں بھر رہی تھی
راستہ لیٹا ہوا تھا
جس کے سینے پر محبت چل رہی تھی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔