عکاس کولکاتہ ۱۹ نومبر ۲۰۲۳ء

مغلیہ سلطنت کی حسیں شاہزادی
مجھے کوئی خواہش نہیں میں بغاوت پہ اتروں
یہ شاہی قلعے کی دیواریں مرے راستے کی رکاوٹ نہیں ہیں
ترا یہ محل۔۔۔ ہاتھیوں کے قدم
اور گھوڑوں کی ٹاپوں کی آواز سے آشنا ہے مگر
اس محل سے پرے ایک دنیا
ترے زمزمہ پیرا ہونے کی خواہش میں
اس کی فصیلوں سے لپٹی ہوئی ہے
تری اک جھلک دیکھنے کے لیے
کتنے دربان راتوں کے جاگے ہوئے
چاک و چوبند حدِّ ادب اپنی گردن جھکائے
یونہی بے یقینی کی حالت میں چلتے رہیں گے
کسی بھی پہر تیرے قدموں کی آہٹ
دلوں کا ردھم توڑ دینے کا باعث بنی تو
مجھے میری آنکھوں کی ویرانیوں کی قسم ہے
تجھے سنگ مرمر پہ چلنے کی خوشبو سے پہچان لوں گا
مغلیہ سلطنت کی حسیں شاہ زادی
تجھے کیا خبر کتنے موروں کے
پنکھوں سے تجھ کو ہوا دی گئی ہے
تجھے کیا خبر کتنے مرمر کے پتھر
ترے پاؤں کا بوسہ
ملنے کی خواہش میں اپنی چمک کھو رہے ہیں
تجھے کیا خبر تیرا دل ایک دیوار ہے
اور دیوارِ گریہ پہ ماتھا ٹکائے
میں کیا مانگتا ہوں
میں کیا چاہتا ہوں
۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔