عکاس کولکاتہ ۱۵ مئی ۲۰۲۲ء

مانا کے تغیر سے بری ہم تو نہیں تھے
تم لوگ بھی انسان تھے ،موسم تو نہیں تھے
دنیا کے حوادث بھی بنے میرا مقدر
میرے لیے اک آپ ہی کچھ کم تو نہیں تھے
آتی جو تری یاد تو ٹھوکر تو نہ کھاتی
پلکوں کے چراغ ،اتنے بھی مدھم تو نہیں تھے
جب تک کہ نہ الجھے تھے ستائش کے بھنور میں
اپنے سے ہم اتنے کبھی برہم تو نہیں تھے
یہ درد کبھی چارہ گری کا نہ تھا خواہاں
یہ زخم کبھی تشنۂ مرہم تو نہیں تھے
کیا یہ بھی ضروری تھا کہ ہم کہتے زباں سے
فطرت کے اشارے شئے مبہم تو نہیں تھے
۔۔۔۔۔۔۔۔۔۔۔۔۔۔۔۔۔۔۔۔