عکاس کولکاتہ ۱۵ جنوری ۲۰۲۳ء

دھنک نظر میں بسا کر لباس لکھوں گا
میں چاندنی کو ترا انعکاس لکھوں گا
کنارِ عشق سجاؤں گا آبلوں کے گلاب
لبِ فراتِ محبت پہ پیاس لکھوں گا
میں کائنات کو تشریح میں کروں گا رقم
چمکتی شب کو ترا اقتباس لکھوں گا
بہ لوحِ حْسن تراشوں گا خال و خد تیرے
ترے بدن کو بہ ہوش و حواس لکھوں گا
محبتوں کا بھرم اس طرح نبھاؤں گا
کہ ہجر میں بھی تجھے اپنے پاس لکھوں گا
وہ چاند جب بھی مرے دل کے صحن میں اْترا
بنامِ حسن لہو سے سپاس لکھوں گا
بچھڑتے وقت مرے واقف مزاج! بتا
جہاں میں کس کو محبت شناس لکھوں گا
عطائے زخمِ رقیباں کی لاج رکھنے کو
میں خوش ہوا بھی تو خود کو اداس لکھوں گا
خیالِ یاس کی رگ سے نچوڑ لوں گا لہو
تمازتِ رخِ صحرا پہ آس لکھوں گا
عطا کروں گا کسے فصلِ فکر کا ریشم؟
میں کس کے نام ہنر کی کپاس لکھوں گا
نظر لگے نہ کسی کی اسی لئے طاہر ؔ
یقینِ وصل ہمیشہ قیاس لکھوں گا
۔۔۔۔۔۔۔۔۔۔۔۔۔۔۔۔۔۔۔۔۔۔