عکاس کولکاتہ ۱۴ جنوری ۲۰۲۴ء

کب کوئی کام بنا اس کی رضا ہوتا ہے
وہ ہی ہوتا ہے جو منظور خدا ہوتا ہے
دل دھڑکتا ہے تو آواز کہاں آتی ہے
یہ وہ قصہ ہے جو خاموش بیاں ہوتا ہے
مارنے والے کو احساس نہیں یہ ہوتا
چوٹ لگتی ہے کدھر درد کہاں ہوتا ہے
یہ زمانہ ہے عجب اس کے نرالے قانون
جرم ثابت بھلے ہو جائے رہا ہوتا ہے
جاگنے والے سے کہتے ہیں ذرا سو جاؤ
سو گیا ہے جو وہ بیدار کہاں ہوتا ہے
اب کے لگتا ہے کہ گلشن میں کھلے ہیں غنچے
دور آشوب کا موسم تو خزاں ہوتا ہے
ناز نخرے بھی لگا کرتے ہیں اچھے شارقؔ
دل میں الفت کا جو ارمان جواں ہوتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔