عکاس کولکاتہ ۱۱ جون ۲۰۲۳ء

بہار میرے مُقدر میں کم سے کم لکھ کر
وہ مطمئن ہے مِری زندگی میں غم لکھ کر
وہ چاہتا ہے کہ مخلص اُسے کہوں اپنا
مِرے نصیب کے اوراق پہ ستم لکھ کر
جلا دیے ہیں سبھی گھونسلے پرندوں کے
شجر کی شاخوں پہ برقِ تپاں نے نم لکھ کر
نہ میکدہ ہے نہ ساقی ہے، جی کو بہلاؤ
اے میرے تِشنہ ذہن لب پہ جامِ جم لکھ کر
میں ایک عمر مُسافت کے بعد لوٹا ہُوں
سفر کے غم کا فسانہ قدم قدم لکھ کر
میں کب تلک رہوں قائلؔ دیارِ ظلمت میں
کبھی تو بھیج خُدایا کوئی کرم لکھ کر
۔۔۔۔۔۔۔۔۔۔۔۔۔۔۔۔۔۔۔۔۔