عکاس کولکاتہ ۱۰ ستمبر ۲۰۲۳ء

اسیر ذات رہے بے قرار ہو کے چلے
شکستہ خواہشوں کا ہم غبار ہو کے چلے
دل و جگر پہ لئے زخم نارسائی کے
دیار عشق سے ہم زار زار ہو کے چلے
وہ جن کے لفظ تھے امرت سے پور پور شفا
گلاب لہجے وہ اب تو کٹار ہو کے چلے
طلسم کیسا ہے کیسی یہ جادونگری ہے
یہاں تو خار بھی رنگِ بہار ہو کے چلے
دیا امید کا اک جل رہا دریچے پر
کہو ہوا سے ذرا ہوشیار ہو کے چلے
وہ حرف حرف تمنا وہ لفظ لفظ وفا
اسی خیال کا ہم تو حصار ہو کے چلے
ہے زیبا اس کو ستم پر سکھیؔ کی خواہش ہے
وہ سنگ دل بھی کبھی اشکبار ہو کے چلے
۔۔۔۔۔۔۔۔۔۔۔۔۔۔۔۔۔۔۔۔۔۔