عکاس کولکاتہ ۹ جولائی ۲۰۲۳ء

خوابِ رفتہ میں ڈوب جانے کی
ہے علامت فریب کھانے کی
دل کی بنجر زمین میں الفت
اس نے کوشش نہ کی اگانے کی
بے سبب خود کو مشتہر نہ کریں
پول کھل جائے گی گھرانے کی
بے نیازانہ جینے والے کبھی
فکر کرتے نہیں زمانے کی
کہہ نہیں پائے کچھ حکیمانہ
جن کو عادت ہے گنگنانے کی
ترجمانِ دل و دماغ بھی ہے
ہے جو تہذیب مسکرانے کی
مست رہئے خودی میں اوروں کو
کیا ضرورت ہے آزمانے کی
دل سے نکلی تو حرف زار ہوئی
بس یہی روح ہے فسانے کی
جن کا اصغرؔ ہے گل چراغِ ضمیر
ان کی فطرت ہے گھر جلانے کی
۔۔۔۔۔۔۔۔۔۔۔۔۔۔۔۔۔۔۔۔