عکاس کولکاتہ ۵ فروری ۲۰۲۳ء

اجنبی ہے تو مرے ذہن میں رہتا کیوں ہے
گر وہ پتھر ہے تو شیشوں کا مسیحا کیوں ہے
جو ہوا ہے تو گزر جائے ہواؤں کی طرح
جو سمندر ہے تو ٹھہرا رہے بہتا کیوں ہے
جس کے چہرے پہ رقم جھوٹ کی تحریریں ہیں
دل اْسی شخص کے وعدوں سے بہلتا کیوں ہے
دل تو معصوم پرندہ ہے اِسے قید نہ کر
یہ ترے نام پہ رہ رہ کے دھڑکتا کیوں ہے
میرے آنگن میں نہیں کوئی اْمیدوں کے گلاب
پھر یہ موسم مرے آنگن میں ٹھہرتا کیوں ہے
بے وفا شخص ترے ہاتھ میں دل رہتا ہے
محوِ حیرت ہوں ترا جبر یہ سہتا کیوں ہے
کچھ منافق مری پرواز سے نہ خوش ہیں سہیل
شہرتِ عرش میں جلتے ہیں کہ اڑتا کیوں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔