بلوغت کی ایک نظم
کھل جا سم سم
کھل جا سم سم
کھل جا سم سم کہنے سے بھی غار دہانہ کب کھلتا ہے!
میں نے اپنے تشنہ،ترسے گرم لبوں سے
نیند کے ماتے تن پر؍ہلکے ہلکے دستک دی تو
کوئی نہیں تھا
کنڈلی مار کے بیٹھی دھوپ سے خود کو ڈسوانے کی لذت
اب شہوت میں بدل گئی تھی
جسم کی وحشت الماری میں اک ہینگر سے لٹک رہی تھی
اس کھڑکی کی انگڑائی میں ایک خزانہ دہک رہا تھا
ایک برہنہ مست کنواری خواہش تھی جو
اب دو مونہی ناگن بن کرپھن پھیلائے جھوم رہی تھی
بیوہ رات کی ترسی آنکھیں کومل لہجہ چوم رہی تھیں
سورہ یوسف پڑھتے پڑھتے
میری سانسیں پھول گئی تھیں
گرچہ مجھ پر غار دہانہ کھلا ہوا تھا
لیکن میں ہی
اپنی پیاس کو تنہا چھوڑ کے
بھاگ آیا تھا!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
