عکاس کولکاتہ ۲ اپریل ۲۰۲۳ء

سو بار مجھے قتل سے انکار نہیں تھا
لیکن مِرا قاتل تھا کہ فنکار نہیں تھا
دیتا تھا ہمیں رنج سا دامانِ وفا میں
حالانکہ ثمر تھا کوئی آزار نہیں تھا
صد حیف سرِ رفعتِ ایوانِ مظاہر
سر جس کا سجا ،صاحبِ دستار نہیں تھا
میں طشتِ محبت میں سجائے ہوئے نکلا
کوئی بھی وفاؤں کا خریدار نہیں تھا
کچھ میں بھی نہ تھا یوسفِ صد بخت مسافر
کچھ یوں بھی یہاں مصر کا بازار نہیں تھا
تھا ہمدم و ہمدوشِ سلیماں نہ پیمبر
کچھ سلسلۂ شوخیٔ رفتار نہیں تھا
کچھ محوِ کنارہ کشِ اظہار تھا میں بھی
کچھ ساتھ نبھانے پہ وہ تیار نہیں تھا
کب میں نے نہ تھا رسوا سرِ اظہارِ تمنا
کب زینتِ موضوعِ سرِدار نہیں تھا
سب ہی تھے درِ سینۂ شب مشلِ برہنہ
اک میں ہی جہاں بھر میں گنہگار نہیں تھا
کل رات بڑے چین سے سویا تھا زمانہ
کل رات مِرے دل پہ کوئی بار نہیں تھا
کل حال عجب سطحِ سمندر کا تھا طاہرؔ
کشتی تھی،مسافر تھے پہ منجدھار نہیں تھا
۔۔۔۔۔۔۔۔۔۔۔۔۔۔۔۔۔۔۔