عکاس کولکاتہ یکم اکتوبر ۲۰۲۳ء

بے محابہ نہ لب کشائی کی
لاج رکھ لی ہے آشنائی کی
جب بھی کم ظرف کو ملا رتبہ
اس نے کیا کیا نہ پھر خدائی کی
کس لئے ہم بھلا دھریں الزام
تھی شکایت ہی نا رسائی کی
جب گناہوں کی کچھ ہوئی رغبت
شرم آڑے تھی پارسائی کی
نیّتوں کا فتور کہتا ہے
کیوں ہو توقیر جَبّہ سائی کی
جن کو لذت ملے اسیری میں
کیوں تمنّا کریں رہائی کی
بھول کر بھی بھُلا سکے نہ کبھی
یاد تازہ رہی جدائی کی
نفرتوں کے بہانے ختم کریں
کوئی تدبیر ہو بھلائی کی
انتہا ہی نہیں کوئی صاؔدق
عظمت و رحم و کِبریائی کی
۔۔۔۔۔۔۔۔۔۔۔۔۔۔۔۔۔۔۔۔