عکاس کولکاتہ یکم جنوری ۲۰۲۳ء

زندگی کا یہ امتحان بھی ہے
اس سے آگے نیا جہان بھی ہے
نانی اماں بتایا کرتی تھیں
آسماں پر مِرا مکان بھی ہے
صرف لوہا وہاں نہیں بِکتا
پھول والے کی اک دکان بھی ہے
تیر نظریں ہی تو نہیں مِرے پاس
ابروؤں کی بڑی کمان بھی ہے
یہ قلم ہی نہیں مِرا ہتھیار
میرے منہ میں مِری زبان بھی ہے
وہ مِرا ہے،یقین پختہ سہی
چھوڑ دے گا کہیں گمان بھی ہے
کھینچتا ہے زمیں بھی پاؤں سے
وہ مِرے سر پہ سائبان بھی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔