مقرر ہو چکا تھا اس طرف انعام اونٹوں کا
گرفتاری کی خاطر بچھ چکا تھا دام اونٹوں کا
سراقہ ابن مالک کو ہوس نے آج اکسایا
چڑھا گھوڑے کے اوپر اور نبی کو ڈھونڈنے آیا
مگر چلتے ہی ٹھوکر لی صبا رفتار گھوڑے نے
جگایا روح خوابیدہ کو پہلی بار گھوڑے نے
یہ اک تنبیہ تھی لیکن سمجھ اس کو نہیں آئی
کہ بعد از صد تامل پھر تعاقب ہی کی ٹھہرائی
نظر آیا اسے اب قافلہ ایمان والوں کا
ہوس نے بھر دیا سو اونٹ سے دامن خیالوں کا
سراقہ خوش ہوا گھوڑے کا دوڑاتا ہوا دوڑا
نہایت زعم سے نیزے کو چمکاتا ہوا دوڑا
گرایا اک جگہ بار دگر راکب کو مرکب نے
جھنجھوڑا روح خوابیدہ کو دستِ قدرتِ رب نے
یہ غیبی تازیانہ تھا یہ تنبیہ الٰہی تھی
ہوا ثابت کہ فالوں میں تعاقب کی مناہی تھی
پھر اکسایا اسے انعام ملنے کی امیدوں نے
خطاب قاتلِ اسلام ملنے کی امیدوں نے
بڑھا پھر چڑھ کے گھوڑے پر جہالت کے اعادے سے
اسی بے رحم نیت سے اسی قاتل ارادے سے
مگر اس مرتبہ دامِ بلا میں پھنس گیا گھوڑا
روایت ہے کہ رانوں تک زمیں میں دھنس گیا گھوڑا
دکھائی پے بہ پے آخر جو قسمت نے نگو نساری
سراقہ کے دلِ وحشی پہ ہیبت ہو گئی طاری
پڑا ہاتھوں میں رعشہ ڈر سے نیزہ گر گیا اس کا
یہ نقشہ دیکھ کر اس کام سے دل پھر گیا اس کا