یہ دل جو ہے مدت سے گرفتارِ تمنا

راجہ محمد یوسف(فرینکفرٹ)

یہ دل جو ہے مدت سے گرفتارِ تمنا

آئے گا اِسے چین سرِدارِ تمنا

صدیوں سے گزرجائیں گے حسرت کے سفینے

لمحوں میں سِمٹ آئے گا آزارِ تمنا

پلکیں ہیں سمیٹے ہوئے اشکوں کے سمندر

کہنے سے گریزاں لبِ اظہارِ تمنّا

لے جائے گا دِکھلانے وہ اُس پار کے منظر

سوتا ہے کہاں دیدۂ بیدارِ تمنّا

مے روز پلاتی ہے نئی تشنہ نظر کو

رنگینیٔ فطرت جو ہے شاہکار تمنّا

یوں دل پہ اتر تے ہیں ترے حُسن کے جلوے

خوابوں میں سجا لیتے ہیں گلزارِ تمنّا

ہم لوگ تھے ناواقفِ اسلوبِ گذارش

لب بستہ گزاری شبِ اظہارِ تمنّا

اِک کیف کا عالم تھا وہاں اور ہی یوسفؔ

دم بھر کو جو دیکھا پسِ دیوارِ تمنّا