یا پھونک سے چراغ، بجھا دے حواس کا

یا پھونک سے چراغ، بجھا دے حواس کا
یا آئینے سے چھین ہنر انعکاس کا

دم گھٹ گیا ہے لمس لطافت سے اے خدا
اعلان کر ہواؤں میں مٹی کی باس کا

ہر آب جو پہ ریت کا پہرہ لگا ہوا
یہ زندگی ہے یا کوئی صحرا ہے پیاس کا

جب دے سکا نہ کوئی گواہی سر صلیب
جرمانہ شہر پر ہوا خوف و ہراس کا

گھر کے سکوت نے تو ڈرایا بہت مگر
وجہ سکوں تھا شور میرے آس پاس کا

ہر دست پر فسوں، یدِ بیضا دکھائی دے
اے روشنی پرست! یہ منظر ہے یاس کا

دستک ہر اک مکان پہ دنیا پڑی مجھے
مقصود تھا سراغ مرے غم شناس کا
٭٭٭