ترا شعار،تری دھج مِرے خیال میں ہے

کاوش عباسی

ترا شعار،تری دھج مِرے خیال میں ہے

سبھاؤ غم میں مِرے،تمکنت ملال میں ہے

وہ تیرا کیفِ تبسم،وہ والہانہ پن

مِرے جنوں کی چمک بھی ترے جمال میں ہے

ترے تکلّمِ رعنا و خوش خیال کی خیر

جو عیش زخم میں تھا، اب وہ اندمال میں ہے

وہ بے خودی ہے کہ دل میں سماں سجا ہے کوئی

فراق ڈوبا ہوا مستیِٔ وصال میں ہے

فغاں کو زمزمہ کر دے،جنوں کو شانت کرے

یہ رنگ بھی تو مِرے یارِخوش خصال میں ہے

بھروسا ہی کفِ دریائے دل کا کیا کاوشؔ

ابھی تو مانا کہ حد میں ہے،اعتدال میں ہے