تینوں نویاں لگیاں یاد رہیاں

تینوں نویاں لگیاں یاد رئیاں تینوں پیار پرانے بُھل گئے نے
تینوں دُکھڑے دینے آ گئے نے تینوں درد ونڈانے بھل گئے نے

توں مر گئیوں سونے چاندی تے تیری دولت ہی کمزوری سی
تینوں سوہنڑیاں نال غریباں سے ہن وقت لنگھانے بھل گئے نے
تینوں نویاں لگیاں یاد رئیاں تینوں پیار پرانے بُھل گئے نے

ہتھ پَھر کے پیار دی منزل ول دو قدم میرے نال ٹریو نہ
تینوں ہک وی وعدہ یاد نئیں تینوں قول نبھانے بُھل گئے نیں
تینوں نویاں لگیاں یاد رئیاں تینوں پیار پرانے بُھل گئے نے

توں ہسدی اِیں تے غیراں لئی توں روندی اِیں تے غیراں لئی
تینوں اَتھروں ساڈیاں یاداں دے پلکاں تے سجانے بُھل گئے نے
تینوں نویاں لگیاں یاد رئیاں تینوں پیار پرانے بُھل گئے نے

توں کنڈے اَپنڑیاں دُکھاں دِے ساڈی راہواں وِچ کھلاری جا
تینوں صادقؔ پیار دے راہواں وچ ہنڑ پھل وچھانے بھل گئے نے
تینوں نویاں لگیاں یاد رئیاں تینوں پیار پرانے بُھل گئے نے