(Last Updated On: )
تیڈے کول حسرتاں دی بارات گھن کے آئے آہیں دے وِچ سجا کے نغمات گھن کے آئے
اپنڑاں تو اولے پالے غیراں توں بچ بچا کے پلکاں دے ہیٹ کج کے اکھیاں دے وچ لْکا کے
انمول موتیاں دی سوغات گِھن کے آئے تیڈے کول حسرتاں دی بارات گھن کے آئے
دُکھی دل دیاں سداواں ارمان بے کسی دے عبرت بھرے فسانے غمناک زندگی دے
دکھ درد سُول صدمے فکرات گھن کے آئے تیڈے کول حسرتاں دی بارات گھن کے آئے
کُجھ سِسکیاں تے آہیں کْجھ پْرملال یاداں کُجھ باکمال سوچاں کُجھ لازوال یاداں
بیتابیِ جگر دے لمحات گِھن کے آئے تیڈے کول حسرتاں دی بارات گھن کے آئے
ڈینہ رات دی اداسی نقشے ویرانیاں دے باسی پْھلاں دی خوشبو منظر ناکامیاں دے
گْلشن دے اْجڑے پْجڑے حالات گِھن کے آئے تیڈے کول حسرتاں دی بارات گھن کے آئے
