طریقۂ واردات

وہ اپنے ٹارگٹ کی تلاش میں ہے۔۔۔
اگر مل گیا تو لاکھوں میں پہچان لے گا۔
۔۔۔۔۔
جیسے ہی ٹارگٹ ملتا ہے، وہ اس کے ساتھ چپک جاتا ہے۔
اور۔۔۔۔
دھیرے دھیرے اس کے اندر جا گھستا ہے۔
اندر جا کر اس پر اپنا کنٹرول حاصل کر لیتا ہے۔
اور پھر اسے حکم دیتا ہے کہ میری جسمانی ساختوں کی نقلیں تیار کرنا شروع کرو۔
۔۔۔ حکم کی تعمیل ہورہی ہے۔
جب سینکڑوں یا ہزاروں نقلیں تیار ہو جاتی ہیں۔
تو۔۔۔
یہ ان نقلوں کو باہم جوڑ کے اپنے جیسے حملہ آوروں کی پوری فوج تیار کر لیتا ہے۔
یہ فوج اس ٹارگٹ کو تباہ کرتی ہوئی، اس کا حصار توڑتی ہوئی فرار ہو جاتی ہے۔
۔۔۔ نئے شکاروں کی تلاش میں۔
۔۔۔۔۔۔۔۔۔۔۔۔
یہ کسی ہالی وڈ فلم کی کہانی نہیں بلکہ ہر وائرس کا طریقۂ واردات ہے۔
آئیے اس کہانی کو سائنسی اصطلاحات میں سمجھتے ہیں۔
وائرس کو اپنا دورِ حیات مکمل کرنے کے لئے سیل کی ضرورت ہوتی ہے۔ یہ کسی بیکٹیریم کا پروکیریوٹک سیل بھی ہو سکتا ہے اور جانوروں یا پودوں کا یوکیریوٹک سیل بھی۔
اس دورِ حیات کے بنیادی مراحل مندرجہ ذیل ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1۔ ٹارگٹ سیل کی شناخت:
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہر وائرس، ہر سیل پر حملہ آور نہیں ہو سکتا۔ ایک وائرس چند اقسام کے سیلز کو ہی اپنا ٹارگٹ بنا سکتا ہے۔ ان سیلز کی شناخت کے لئے ان کی بیرونی میمبرین پر چند ضروری ریسیپٹرز ہونے چاہیئں۔ یہ ریسیپٹرز زیادہ تر، پروٹین یا گلائکو لیپڈ یا گلائکوپروٹین پر مشتمل ہوتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
2۔ وائرس کا اتصال Attachment
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس اپنے میزبان خلیے کے ریسیپٹر پر چپک جاتا ہے۔ ریسیپٹر پر چپکنے کے لئے وائرس کے کیپسڈ یا envelope پر مخصوص مالیکیولز ہوتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
3۔ وائرس کا خلئے میں داخل ہونا
Penetration
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چپکنے کے کچھ ہی دیر بعد وائرس، اس خلئے کے اندر داخل ہو جاتا ہے۔ بعض صورتوں میں یہ اپنا کیپسڈ باہر ہی چھوڑ دیتا ہے اور صرف جینوم اندر داخل ہوتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
4۔ خول اتارنا Uncoating
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس اپنا کیپسڈ یا envelope کا خول اتار پھینکتا ہے تاکہ اسے خلئے کے نیوکلیئس یا کروموسومز تک رسائی مل جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
5۔ ٹرانسکرپشن Transcription
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈی این اے وائرس، خلئے کے اینزائمز استعمال کر کے میسنجر آر این اے mRNA کی تشکیل کرتا ہے۔ یہ عمل ٹرانسکرپشن کہلاتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
6۔ پروٹین کی تیاری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ mRNA خلئے کی مکمل مشینری استعمال کر کے وائرس کے لئے درکار پروٹین تیار کرنا شروع کر دیتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
7۔ ریپلی کیشن Replication
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پروٹین کے ساتھ ساتھ وائرس کے جینوم کی نقلیں بھی دھڑا دھڑ تیار ہونا شروع ہو جاتی ہیں۔
اس مرحلے پر خلیہ، وائرس کی مکمل غلامی اختیار کر لیتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
8۔ اسمبلی Assembly
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس کے تمام مطلوبہ مالیکیولز کی بے شمار نقلیں تیار ہونے کے بعد انہیں اسمبل کرنے کا کام شروع ہو جاتا ہے۔ یہ عمل کسی کارخانے میں کل پرزوں کو جوڑ کر مشین اسمبل کرنے کی مانند ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
9۔ توڑ پھوڑ اور فرار
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک خلئے میں اندازاً ایک لاکھ وائرسز تیار ہو جاتے ہیں۔ اب یہ خلیہ ان نو تشکیل شدہ وائرسز کے لئے کام کا نہیں رہا۔ لھذا یہ اس کی سیل میمبرین اور دیگر حصاروں کو توڑتے ہوئے، خلئے کے ٹکڑے اڑاتے ہوئے وہاں سے فرار ہو جاتے ہیں۔
۔۔۔۔ اب ان لاکھوں وائرسز کو تلاش ہے نئے ٹارگٹس کی، جہاں یہ اپنا طریقۂ واردات ایک بار پھر دہرا سکیں۔
۔۔۔۔۔۔۔۔۔۔۔۔۔۔۔۔۔۔۔۔۔ ختم شد ۔۔۔۔۔۔۔۔۔۔۔۔۔۔۔۔۔۔