تنہا تماپوری(تما پور)ؔ
سیاسی تاریکی
پہلے کے اس دور میں
اندھے کے پاوں کی
آنکھ بنا
اک لنگڑا
کندھوں پر بیٹھاتھا
تب منزل آسان لگی تھی
لیکن
اب کے دور میں
اندھا
لنگڑے کے کندھوں پر بیٹھا
گھور اندھیرا
بانٹ رہاہے
۔۔۔۔۔۔۔۔۔۔۔۔۔۔۔۔۔۔۔۔
ڈوری
مجھ کو سلانے
کی خاطر
وہ
میری کھلی کھلی آنکھوں کو
ریشم جیسی
لوری کی ڈوری سے
باندھ کے رکھتی تھی۔
اب وہ ڈوری
کہیں نہیں ہے
میری ان جاگی آنکھوں کو
کون سلائے؟؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اپنی مٹی
خواب کے دل میں آنکھ جاگی ہوئی
دل کی دھڑکن میں رات جلتی ہوئی
رات کی بات کوئی کھوئی ہوئی
بات: لفظوں کا خواب، ٹوٹاہوا
لفظ: مٹی سے کھیلتا بچہ
مٹی: مٹی ہے صرف مٹی ہے
بے حس وبے وفا بڑی ظالم
مٹی انگور کا وہ خوشہ ہے
جس کی خاطر اچھلتے رہنا ہے
اس کو پانا ہے پاکے کھونا ہے
ایسا جینا بھی کوئی جینا ہے
جی کے مرنا ہے مر کے جینا ہے
آنسوؤں کی لڑی پرونا ہے
کچے پکے اداس لمحوں میں
سانس درسانس مسکرانا ہے
رات مٹی کی، دن بھی مٹی کا
وقت مٹی ہے، خواب مٹی ہے
پیاس بجھتی نہ بھوک مٹتی ہے
بے حس و بے گمان و بے لذت
بے دلی سے بھرا ہوا اک دل
اب تو یہ دل بھی صرف مٹی ہے
اپنی مٹی خراب ہے یارب!
زندگی اب عذاب ہے یارب!
۔۔۔۔۔۔۔۔۔۔۔۔
گلاب قصے
سراب رستے
عذاب منزل
گلاب قصوں کا میں مسافر
اگر ذرا سا بھی حوصلہ ہے
تم اپنی آواز بھیج دینا
میں گونج بن کر
سراب رستوں کے نیلے چھت پر
ستارے ٹانکوں
تبھی تو سبزہ برس پڑے گا
تمھاری سوکھی ہوئی زمیں پر
گلاب قصے مہک اٹھیں گے
پڑوس موسم کے خشک چہرے میں
جیتے رہنے کی بددعاکو
اتار پھینکو۔ یہ ساری بدبو تو بس ہوا ہے!
تمہارے دامن کے پاک دھبے تو
لوریوں کی تلاش میں ہیں
تمہاری سوکھی ہوئی زمیں پر
گلاب قصے مہک اٹھیں گے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آخرش
سڑتی ہوئی انسانیت
سبزہ چراکر لے گئی
اگنے لگے ہیں حادثے
اپنا بدن جیتے ہوئے
جسموں کے ننگے پیڑہیں
تہذیب کے پیراہنوں کو
ڈھونڈنا دیوانہ پن
دیمک زدہ اوراق میں
لفظ گندے ہوگئے
ماضی کا چہرہ کھوگیا
سوچ کی چادر کے ریشوں میں
الجھ کر
سارے احساسات کو
حیرت زدہ کرتی ہوئی
مٹھی میں
خالی ریت ہے
۔۔۔۔۔۔۔۔۔۔۔۔۔۔۔۔۔۔۔۔۔۔
آج کی شب
ایسی اک رات کلبلائی تھی
ایسا اک خواب کسمسایا تھا
ایسا اک وقت، شائد اک لمحہ
میرے اندر سے میرے باہر سے
کیا پتہ کس طرف سے آیا تھا
بند آنکھیں تھیں سر تھا سجدے میں
آنکھ کھلتے ہی تھا دعا کا غبار
مسجدوں میں چمکتی رحمت تھی
اور نمازی تھے گم دھندلکوں میں
سب کی جیبوں میں خواہشوں کے حساب
سب کی آنکھوں میں آس کے قطرے
آج کی شب بڑی مقدس تھی
آج کی شب میں تھے دلا سے بہت ……
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کلیدِرحمت
تپتی ہوئی زمیں پر
اللہ کا جو گھر ہے
وہ مرکز نظر ہے، ٹھنڈک ہے جسم و جاں کی
راحت ہے ،دوجہاں کی، وہ خانۂ اماں ہے
اک روز یوں ہوا تھا
عثمان ابن طلحہ
اس خانۂ اماں میں
سر کار دو جہاں کو، جانے سے روکتے تھے
اک ایسا دن بھی آیا۔ سردار دو جہاں جب
مکہ کو فتح کرکے، کعبہ پہنچ چکے تھے
دست نبی میں اس دم
کعبے کی کنجیاں تھیں
عثمان ابن طلحہ شرمندہ، سر جھکائے
حیران سے کھڑے تھے
اس روز یوں ہوا تھا
اس فخر دو جہاں نے
کعبے کی کنجیاں سب ان ہی کو بخش دی تھیں
بخشش کی یہ مثالیں، رحمت کے یہ نمونے
ڈھونڈو گے کس زمیں پر
پاؤگے کس کے دل میں؟
۔۔۔۔۔۔۔۔۔۔۔۔۔۔۔۔۔۔۔۔۔۔
جلتے رشتے
نیم شب
کمرے کے دروازے نے
پلکیں موندلیں!!
کس قدر حیران
کھڑ کی کی کھلی پلکوں نے
جو دیکھا
کھلی پلکیں
کھلی ہی رہ گئیں !!!
بند کمرے میں
بہوتھی
اور اسی بستر پہ تھا
شوہر کا باپ!!
لگ چکی تھی کتنے ہی رشتوں
میں آگ!!!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تحفظ
اس نے
اپنا بدن بچھاکر
مجھ کو
ایسے ا وڑھ لیا ہے
جیسے وہ
محفوظ ہوگئی ہو
انجانی
بلاؤں سے!!
۔۔۔۔۔۔۔۔۔۔۔۔۔۔۔
آخری آنسو
کل کی بات نہیں ہے بھائی
صدیاں بیت گئی ہیں شائد
جب ہم راہ تکاکرتے تھے
ڈوبتا سورج
ہرپکشی کو اس کے ٹھکانے تک بھیجے گا
مویشیوں کو دروازوں تک لاچھوڑے گا
رات کے اونچے چھت سے تارے
کھڑکی میں سے جھانک جھانک کر
ماں سے چولہے چکی کی کچھ بات کریں گے
اور لوریاں گا کر چندا
ہم سب کو بستر پر پیار سے پھیلادے گا
یہ سب کل کی بات نہیں ہے
صدیاں بیت گئی ہیں شائد
پتہ نہیں کیوں آج کا سورج
ڈوبتی گھڑیوں میں بوڑھا سا لگنے لگاہے
لگتاہے وہ بلک رہاہے
اپنے اجالوں میں اس نے بھی گلی گلی میں دیکھاہوگا
بھاشاؤں کا ریب ہواہے، گندے دھماکے چیخ رہے ہیں
دھرم کے نطفے سے شیطان کا جنم ہوا ہے
دھرتی اتا کو انگوں کو
اس کے ہی بیٹوں نے خود میں بانٹ لیاہے
خوف، بھیانک خوف کا جنگل اگا ہوا ہے
اب ہم روز تکاکرتے ہیں
خون کا پیاسا خنجراپنے دروازوں پر
دستک دے گا
کھڑکی سے گولی جھانکے گی
ماں کے چولہے میں گیتا کے پنّے ہوں گے
راکھ سمیٹے قرآنی اوراق گڑمیں……………………
آگے کوئی لفظ نہیں ہے، بات نہیں ہے
ذہن کے تہہ خانے میں کوئی سوچ
نہیں ہے
میں اپنے بچوں میں آنسو بانٹ رہا ہوں!!!
