تماشا دیکھنے لائق نہیں تھا

تماشا دیکھنے لائق نہیں تھا
تماشے میں کہیں تم ، میں کہیں تھا

تمھارے بعد دنیا مر چکی تھی
تمھارے بعد جو کچھ تھا— نہیں تھا

جہاں تم تھے ، تمھاری چاندنی تھی
مرے جینے کا ساماں سب وہیں تھا

تمھارے ماسوا ، ّحدِ نظر تک
زمیں تھی ، چرخ تھا ، عرشِ بریں تھا

بس اک تم فاصلوں سے ماورا تھے
کوئی تھا دُور ، یاں کوئی قریں تھا

فلک زادوں سے میری کیسے بنتی
فلک زادوں میں فرزندِ زمیں تھا

سفر تم نے کیے بیکار جاویدؔ
کہاں جاتے تھے تم اور وہ کہیں تھا