طاہر عدیم کی سات غزلیں

طاہر عدیم(جرمنی)

فقط اک گھونٹ ہے دل کو لبالب جام دریا کا

سمندر دسترس میں ہو تو پھر کیا کام دریا کا؟

کنارِ چشم سے جب بھی طوافِ عشق کو نکلا

بنی ہے چاندنی ہر مرتبہ احرام دریا کا

فنا ہو کر دلیلِ رونقِ بحرِ رواں رہنا

یہی دستورِ قُدرت ہے یہی انجام دریا کا

بھٹکتا ہے غلافِ چشمِ بینا کے تصرف کو

اٹکتا  خوشہِ ہر اشک میں پیغام دریا کا

محبت زینتِ پاپوش ہم نے اس طرح کر دی

کہ جیسے بہرِ خاص و عام، فیضِ عام دریا کا

فقط ہم ہی نہیں ہیں کشتگانِ لہجہءِ صرصر

ہے دیکھا پُر شکن چہرہ بھی وقتِ شام دریا کا

یہ کیا طاہرؔ کہ سسیؔ کو تو کارِ عشق نے نِگلا

بہ لوحِ وقت لیکن نام ہے بدنام دریا کا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ درد، وہ وفا، وہ محبت تمام شُد

لے۔۔۔ دل میں تیرے قُرب کی حسرت تمام شُد

یہ بعد میں کھُلے گا کہ کس کس کا خوں ہُوا

ہر اک بیان ختم، عدالت تمام شُد

تُو اب تو دُشمنی کے بھی قابل نہیں رہا

اُٹھتی تھی جو کبھی وہ عداوت تمام شُد

اب ربط اک نیا مجھے آوارگی سے ہے

پابندیِ خیال کی عادت تمام شُد

جائز تھی یا نہیں تھی ترے حق میں تھی مگر

کرتا تھا جو کبھی وہ وکالت تمام شُد

وہ روز روز مرنے کا قصہ ہُوا تمام

وہ روز دل کو چیرتی وحشت تمام شُد

وہ میرے قُرب میں ہے بہت بے سکون سا

اُس کے سکون کو ہے قرابت تمام شُد

اب آ کہ اپنا اپنا اثاثہ سمیٹ لیں

اب ہم پہ وقت کی ہے سخاوت تمام شُد

طاہرؔ میں کُنجِ زیست میں چپ چاپ ہوں پڑا

مجنوں سی وہ خجالت و حالت تمام شُد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مایوسی میں دل بے چارا صدیوں سے

ڈھونڈ رہا ہے ایک سہارا صدیوں سے

ایک ہی بات عبث دہرائے جاتا ہے

تن میں چلتا سانس کا آرا صدیوں سے

ہیرؔ اگرچہ میں نے اپنی پا لی ہے

ڈھونڈ رہا ہوں تخت ہزارا صدیوں سے

تم سے کیسے سمٹے گا یہ لمحوں میں

دل اپنا ہے پارا پارا صدیوں سے

کس اعلان کو گونج رہا ہے نس نس میں

دھڑکن دھڑکن اک نقاّرا صدیوں سے

کوئی منزل ، عشق میں کوئی کام ملے

دل آوارہ ، ہے ناکارا صدیوں سے

دل پر کیا ہم نے تو جاناں! جان پہ بھی

لکھ رکھا ہے نام تمہارا صدیوں سے

اُس نے دل کے درد سے پوچھا۔۔کب سے ہو؟

دل سے اُٹھ کے درد پکارا صدیوں سے

خُشک پڑا ہے آنکھ کے پردے پر طاہرؔ

بحرِ درد کا ایک کنارا صدیوں سے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مرحبا! جب قتل پر میرے پکارا دوسرا

مات میری تھی مگر یہ کیا کہ ہارا دوسرا

میں اشاروں کی زباں میں سر پٹختا رہ گیا

اُس نے مارا ہر اشارے پر اشارا دوسرا

خود بخود پھر اُس کے اندر برچھیاں چلنے لگیں

اُس نے میری پیٹھ میں جب تِیر مارا دوسرا

رنگ اُس کا ہر دفعہ اک اور ہی آیا نظر

رنگ جب بھی اُس کے چہرے کا اُتارا دوسرا

پوچھتے ہو ۔۔ کیا رہا حالِ خلاصائے حیات

ایک لمحہ ہُوں جیا اور ہے گُذارا دوسرا

کون جانب چھپ گئے ہیں روشنی کے وہ سفیر

ایک مثلِ چاند تھا تو تھا ستارا دوسرا

گو بہت اچھا تھا لیکن پہلے جیسا وہ نہ تھا

نقش ہم نے جو بھی کاغذ پر اتارا دوسرا

ایک ہی تو ہے سہارا کامرانی کی دلیل

مات ہو گی جب بھی ڈھونڈو گے سہارا دوسرا

اُس کو لوٹاتے نہ یارو!! ہم کبھی بھی خالی ہاتھ

لازماً دیتے جو ہوتا دل ہمارا دوسرا

عُمر بھر ملنا نہیں پر ساتھ چلنا ہے ہمیں

اک کنارا میں ہوں طاہرؔ وہ کنارا دوسرا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ جواہر سنبھالتا ہوں میں

اشک آنکھوں میں پالتا ہوں میں

سُرخ رنگِ فلک نہیں یوں ہی

خُون دل کا اُبالتا ہوں میں

روز قسمت سے ہار جاتا ہوں

روز سکہ اُچھالتا ہوں میں

روز کرتا ہوں ایک ان ہونی

روز ہونی کو ٹالتا ہوں میں

گھولتا ہوں مٹھاس باتوں میں

اور سمندر میں ڈالتا ہوں میں

اپنا قِصہ تمام سے کہہ کر

اپنی پگڑی اچھالتا ہوں میں

زندگی کے ہر ایک چکر کو

ایک چکر میں ڈالتا ہوں میں

روز ملتا ہے اک نیا موتی

روز دل کو کھنگالتا ہوں میں

اُس کو طاہرؔ مری ضرورت ہے

اٰس لئے جاں سنبھالتا ہوں میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

(اپنے بیٹے سجاول سلطان کے لئے)

روشنی کر دے سَر بہ سَر مولا

اس کی آنکھوں میں نُور بھر مولا

صرف تیرا اسے سہارا ہو

صرف تیرا ہی اس کو ڈر مولا

اس کی خوش قسمتی رہے دائم

اس سے قائم ہے میرا گھر مولا

اس کی پرواز ہو ثُریا تک

کر دے مضبوط اس کے پر مولا

نیکیاں ہوں قریب ، اور قریب

دُور اس سے ہوں سارے شر مولا

شبِ تیرہ میں میرے کم سِن کے

حوصلوں کو بلند کر مولا

یہ مُجھے اس قدر ضروری ہے

جیسے گھر کیلیئے ہو دَر مولا

بر ضرورت ، تسلیوں کیلیئے

دوڑ کر آئیں بحر و بر مولا

صرف کہنا ہے لفظِ ,کُن، تُو نے

صرف لگنا ہے لمحہ بھر مولا

حالِ دل جب بتا دیا تجھ کو

یوں لگا ہو گئی سحر مولا

اور جو کچھ نہ کہہ سکا بابا

کہہ رہی ہے یہ چشمِ تر مولا

سب کو یہ کہہ دیا ہے طاہرؔ نے

میرا کوئی نہیں مگر مولا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہر اک انجام اُس چنچل پہ چھوڑا

جلا کر اک دیا ہے جَل پہ چھوڑا

جیئے ہیں عرصہءِ آئندہ میں ہم

ہمیشہ آج ہم نے کل پہ چھوڑا

تغیر  دل کے سارے موسموں کا

جبینِ جانِ جاں کے بَل پہ چھوڑا

اُگلتی ہے ، نگلتی بھی نہیں ہے

مجھے اُس نے عجب دلدل پہ چھوڑا

کمانِ وصل ، تیرِ ہجر کھینچا

نشانہ لے کے جسمِ شل پہ چھوڑا

حسابِ ہر عذابِ ہجر طاہرؔ

تمہارے وصل کے اک پل پہ چھوڑا