(Last Updated On: )
شکر لکھ لکھ جو قلم چم لئے نعتاں دے ہتھ
ایہ کمال آپ دا سارا مِرے تے ناں دے ہتھ
جد گئے آپ دی دہلیز تے سوچاں دے ہتھ
فرش تے رہ کے چمیندے رہے عرشاں دے ہتھ
ہوٹھ پھل پاک دیاں پتیاں تریل آ لائو
جرم دی دھپ توں وڈھا بیٹھے اسیں چھاں دے ہتھ
جس گھڑی تیرے نگر ویکھ لیا دستر خوان
آگئے اوس گھڑی یاد مرِی ماں دے ہتھ
انج پھسی کفر دے پنجے تری امت آقا
ٹُک چڑھے ہون کسے بھکھاں مرے کاں دے ہتھ
اک جھلک آپ دی بیمار دا جیون آقا
ہے زمانے دی نبض ویکھ ترے ناں دے ہتھ
تاج اعجاز بتیرا اے ثنا خوانی دا
نعت دے ہتھ تے نیں بیعت مِرے ساہواں دے ہتھ
