شہناز نبی(کولکتہ)
جس نے درِ وحشت کیا وا دشتِ جنوں میں
اس نے مجھے زنجیر کیا دشتِ جنوں میں
سب ارض و سما بھرنے لگے چاپ سے اپنی
کیا لگتی تھی قدموں کی صدا دشتِ جنوں میں
کھل جاتا کبھی سر تو چلی آتی تری یاد
رکھ جاتی مرے سر پہ ردا دشتِ جنوں میں
اک نقشِ عبادت نے کیا ایسا چراغاں
ہر گام پہ جلتا تھا دیا دشتِ جنوں میں
اس نے تو بچھائے تھے بہت خار سرِ راہ
کیا تم سے کہیں رنگِ حنا دشتِ جنوں میں
ہو کرنے میں شہروں کوتھے مشہور بہت تم
بدنام ہوا وہ جو مٹا دشتِ جنوں میں
کس کس سے کہیں گھر کی طلب ہم کو نہیں تھی
یہ کیا ہے جو آباد کیا دشتِ جنوں میں
۔۔۔۔۔۔۔۔۔۔۔۔۔۔۔۔۔۔۔۔۔۔۔
خدا سے کہہ دو کوئی درمیاں نہ آئے گا
وہ آج جھوٹ پہ بازی نئی سجائے گا
سبھی گراں ہیں بہت اس کے طبعِ نازک پر
مگر وہ مجھ کو ہی محفل سے اب اٹھائے گا
کوئی نہیں ہے مرے دل کی سبزخیزی میں
یہ خود ہی روز بغیچے نئے سجائے گا
نہ جانے کس نے سمیٹی ہے اتنی تنہائی
وہ کون ہے جو یہاں گھر کی نیو ڈالے گا
میں چھوڑ جاؤں تو یادوں کا یہ خرابہ مگر
مری طرح سے اسے کون پھر بسائے گا
سمیٹ کر ذرا چل دو تڑی گھڑی میں کہیں
کہ کوئی دم میں قیامت نئی اٹھائے گا
وہ جس نے سلب کی آواز اہلِ زنداں کی
کبھی تو داغِ گلستاں جگر پہ کھائے گا
۔۔۔۔۔۔۔۔۔۔۔۔۔۔۔۔۔۔۔۔۔
اب اپنا ہر سلیقہ کیوں خطا کاری میں آتا ہے
کہ سچا عشق بھی طرزِ گنہ گاری میں آتا ہے
کوئی کیا جانے کب بے فیض ہوجائے گی یہ صحبت
گرہ میں رکھ لو جو نکتہ سمجھ د ار ی میں آتا ہے
اسے کہہ دو کہ ہر گز رخ کرے نہ دشتِ وحشت کا
کہ یہ اب قطعہ بھی اپنی عملد اری میں آتا ہے
ابھی تک ہم اکیلے رو رہے ہیں شب گزیدوں پر
اے شہرِ بے بصر تو کب عزا داری میں آتا ہے
وہی ہیں فرصتیں لیکن نہیں ذکرِ وفا کوئی
کہ اب یہ فعل بھی دل کی گرانباری میں آتا ہے
بہت چاہا کہ طرزِ ز ندگی اپنی بدل ڈالیں
مگر اوروں کو خوش کرنا ریاکاری میں آتا ہے
اٹھا کر منہ چلے جائیں گے بزمِ یار میں لیکن
یہ طورِ بندگی مشقِ سبک ساری میں آتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔
کلبۂ جاں کی اداسی میں سنبھل کر آئے
اس کو آنا ہے تو انداز بدل کر آئے
دل کسی طور اٹھا تا نہیں احسا ن کوئی
کہہ دو خوشیوں کو ذرا غم کو بھی حل کر آئے
کوئی گنتا ہے اگر راتوں میں تارے ہمیں کیا
ہم بھی صحرائے لق و دق سے نکل کر آئے
وہ جو چاہے تو کسے ہم کو کسوٹی پہ مگر
بے خطر ہم بھی تو شعلوں میں ہیں جل کر آئے
ان کو ہر چہرہ بہت صاف نظر آتا ہے
نیند کے ماتے سبھی آنکھوں کو مل کر آئے
اب نئے باغ سجانے کی تب وتاب نہیں
ہم تو ہر برگِ تمنا کو مسل کر آئے
کون رکھتا ہے سرِ نوکِ مژہ خو اب نئے
اس سے کہہ دہ کہ وہ تعبیر بدل کر آئے
بابِ احساس کے کھلنے پہ ندامت کیسی
موج سرکش ہے تو ساحل پہ اچھل کر آئے
پھر سے تنہائی میں پھن کاڑھ لیا کرتی ہیں
اپنی دانست میں یادوں کو کچل کر آئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہر سمت سے پتھر ہی پذیرائی کو آئے
جیسے کہ ترے شہر میں رسوائی کو آئے
بس ایک وہی واقفِ اسرار ہے اپنا
اس دشت میں ملنے ترے سودائی کو آئے
کب ہم کو کسی رشتۂ جاں کی ہے تمنا
کوئی تو تکلف میں شناسائی کو آئے
ہے دل میں شکایات کا دفتر کوئی پنہاں
ہم بر سرِ دربار ہیں شنوائی کو آئے
کب ہم سا کوئی ناصیہ سا تجھ کو ملے گا
ہر پل تری چوکھٹ کی دلآسائی کو آئے
لو ہم نے سبھی چاکِ جگر سی لئے اپنے
لوٹا دو اسے جو بھی مسیحائی کو آئے
کیا سوچ کے فریاد رسی تم نے اٹھا دی
ہم ضبط کے مارے تو شکیبائی کو آئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اسے کہو کہ یہ دل پھر سفر ارادہ کرے
ہمارے قدموں پہ صحرا کو وہ کشادہ کرے
حصارِ زیست سے آگے بھی مرحلے ہیں کئی
ابھی نہ مجھ کو اسیرِ صد ائے جا د ہ کرے
یہ مانا مجرمِ حق گو ئی ہے زبا ن مگر
سبب ہے کچھ کہ اسی جرم کا اعاد ہ کرے
پتہ کرو کہ کہا ں پہ ر کھا ہے زخم نیا
کیوں التفات مرے حق میں حد سے زیادہ کرے
یہ کم نہیں کہ زمانے میں اس کی شہرت ہے
اب اور کیا مری وحشت سے استفادہ کرے
قسم ہے مڑ کے تری اور ہم نہ د یکھیں گے
اے شاخِ سبز تو چھاؤں کا جو بھی وعدہ کرے
وفاکا رنگ جھلکنے لگا ہے آنکھوں سے
وہ چاہے جتنا غمِ عشق کو لبادہ کرے
یہ کیسا جھوٹ ہے جس کی سیاہی چھپتی نہیں
تکلفات میں لہجے کو جتنا سادہ کرے
زمیں کے بخرے جو کرنے چلا ہے کہہ دو اسے
جو ہو سکے تو خلا کو بھی آدھا آدھا کرے
۔۔۔۔۔۔۔۔۔۔۔۔۔۔۔۔۔۔۔۔
اک اژدھامِ صوت و صدا ہے تو کیا ہوا
وہ تواکیلے چلنے پہ ہے پھربھی تلا ہوا
ٹوٹے ملے ہیں آئینے، آنکھیں لہو میں تر
بس ایک تیرا عکس تھا سالم بچا ہوا
آتا ہے اس پہ رشک بہت آندھیوں کو بھی
وہ اک چراغ جانے ہے کب سے جلا ہوا
اس کی زبانی اپنی تباہی کی داستاں
ہر بار تازہ لگتا ہے قصہ سنا ہوا
حیراں ہوں محفلوں میں تری جاؤں کیسے میں
اک دل ہے اپنے پاس مگر کچھ بجھا ہوا
شاید کہ اب بھی راس نہ آئی اسے فضا
ـرہتا ہے یوں تو شہر میں لیکن ڈرا ہوا
آخر وہی ہوا کہ برے خواب سچ ہوئے
اس نیند سے تو اچھا مرا رت جگا ہوا
بنیادیں لڑکھڑانے لگی ہیں ، سنبھالنا
زخمی سپاہیوں سے قلعہ ہے پٹا ہوا
