شہناز نبی(کلکتہ)
میں کن بجھی ہوئی آنکھوں میں خواب رکھنے لگی
کہ ریگ زاروں میں جیسے سراب رکھنے لگی
انہیں تو پہلے بھی ہرگز نہ تھا وفا کا خیال
وہ پھر سے کانٹوں میں اپنا گلاب رکھنے لگی
ابھی تو اس کے لبوں پر سوال آئے نہیں
ابھی سے کیوں سرِ منظر جواب رکھنے لگی
سمندروں کی عداوت کا راز جب سے کھلا
ہر ایک لہر جوازِ حباب رکھنے لگی
کسے پتہ کہ کوئی کیا جہاں تہاں سے پڑھے
سو وہ رفاقتِ غم کا نصاب رکھنے لگی
وہ جب سے گننے لگا ہے عنایتیں اپنی
جفا و جور کا جاں بھی حساب رکھنے لگی
کوئی کہیں سے پکارے تو کوئی ساتھ چلے
مسافتوں میں وہ گھر کے عذاب رکھنے لگی
پھر اسکے بعد کسی کے نہ ہو سکے آنسو
انہیں عزیز جو چشمِ پر آب رکھنے لگی
بھٹکتی پھرتی تھی وحشت، ٹھکانہ جوں ہی دیا
ہمارے دل کو وہ تب سے خراب رکھنے لگی
ہمارے جرم تو ثابت نہیں ہوئے ہیں مگر
نگاہِ لطف و کرم بھی عتاب رکھنے لگی
مجھے تو اب کوئی نسبت نہیں ہے دنیا سے
کتابِ زیست میں پھر بھی یہ باب رکھنے لگی
سبھی تو وہم و گماں کے حوالے بن کے ملے
سو دل کے رشتوں میں وہ بھی سحاب رکھنے لگی
۔۔۔۔۔۔۔۔۔۔۔۔۔۔۔۔۔۔۔۔۔۔۔
ہر طرف میری کراہیں، سسکیاں
گنبدِ بے در صدائیں ،سسکیاں
دور تک کرتی رہیں پیچھا مرا
ڈبڈبائی سی نگاہیں ، سسکیاں
بیچ میں تھے سرحدوں کے سلسلے
دونوں جانب تھیں دعائیں ،سسکیاں
سر برہنہ پھر رہی ہوں دیر سے
دھجی دھجی سی ردائیں سسکیاں
ایک منظر دیدۂ بے خواب میں
آگ، خوں، ملبے، کراہیں سسکیاں
کیسا ماتم ہے زمیں تا آسماں
اشک آلودہ فضائیں سسکیاں
تو سزا دینے پہ قادر ہے مگر
اس طرف میری دعائیں سسکیاں
میری تنہائی نڈر کر دے مجھے
چھین لے مجھ سے پناہیں سسکیاں
چار دیواری تو زیرِ اسم ہ ے
گھر میں رہتی ہیں بلائیں سسکیاں
۔۔۔۔۔۔۔۔۔۔۔۔۔۔۔۔۔۔۔۔۔۔۔
جدا ہوا تو یہ اندازہ سخت قاتل تھا
وہ ایک شخص ہی اس زندگی کا حاصل تھا
میں دیکھتی تھی اسے شیشۂ انا کے ا’دھر
وہ بولتا بھی تو میرا سمجھنا مشکل تھا
میں ڈھونڈتی تھی سمندر پہ لکھی تحریریں
عقب میں یوں تو مرے خط شکستہ ساحل تھا
مری تباہی کا اک وہ ہی ذمہ دار نہیں
کچھ اس میں مجھ سے مرا بغض بھی تو شامل تھا
نہ جانے کون سے رستے پہ چھوڑ آئے اسے
سفر میں کوئی تو اپنا نشانِ منزل تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔
ادا مخلص، وفاؤں کا چلن تھا
میں روتی ہوں جسے وہ میرا من تھا
تعلق میں ہے اب بے گانگی سی
کبھی بے گانگی میں اپنا پن تھا
ادھر سورج سے تھی پیکار میری
ادھر وہ شخص گہرا سبز بن تھا
سبھی چہرے نکیلے، آڑے ترچھے
وہ میری ریزگی پہ طعنہ زن تھا
الجھتی جا رہی تھیں ساری سمتیں
وہ منزل آشنا تھا، ضو فگن تھا
واں سلکِ آخری کی بے بسی تھی
یہاں نازاں بہت یہ پیرہن تھا
اسے بھی موسمِ غم نے نہ بخشا
جو ہنستا کھیلتا سا اک چمن تھا
وہیں سے ہجر کا آغاز ٹہرا
جہاں سے وصل کا پہلا گمن تھا
اسے کیا کوئی پاٹوں میں پسے تو
وہ اپنے کھیل میں کتنا مگن تھا
ادھر ہم دشتِ وحشت میں رواں تھے
ادھر گلگشت میں وہ سیم تن تھا
نہیں شوقِ ستم اس میں بھی باقی
کبھی جو باعثِ رنج و محن تھا
بھٹکتا ہے جو ، اب پرچھائیوں سا
کبھی وہ شخص بھی اک انجمن تھا
۔۔۔۔۔۔۔۔۔۔۔۔۔۔۔۔۔۔۔۔۔
ملنے کا سکھ بچھڑ نے کا غم روکتا نہ تھا
اب کے سفر میں یاد کا اندوختہ نہ تھا
اس کی نظر سے خود کو میں پہچاننے لگی
وہ آئینہ تھا منہ سے کبھی بولتا نہ تھا
میں خاک ہو کے آپ ہی اپنی کرید ہوں
پہلے بھی جاں گداز تھی تن سوختہ نہ تھا
خود پر ہے اعتماد نہ باقی ترا یقیں
پہلے یوں بات بات پہ دل ٹوکتا نہ تھا
میرے اشعار میں وہ لگا کتنا منفرد
میری طرح تو کوئی اسے سوچتا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔
ملے تو ہو مگر جینے کی خواہش جا رہی ہے
مجھے یہ زندگی کن خوابوں میں الجھا رہی ہے
بدن پہ آبلے پڑتے ہیں ٹھنڈی چاندنی میں
تپش بے رحم سورج کی سکوں پہنچا رہی ہے
کہیں گھنگرو سے بجتے ہیں سنہری وادیوں میں
یہاں پاؤں کی مہندی زرد ہو تی جا رہی ہے
مری قندیلیں کیسی آندھیوں میں گھر گئی ہیں
ہوا کیوں میرے آنگن میں یہ نوحہ گا رہی ہے
خزاں کی زد میں کھلتے ہیں کہیں شاخوں پہ غنچے
یہاں ذکرِ بہاراں سے کلی مرجھا رہی ہے
میں اپنے آئینے میں عکس کیوں دیکھوں تمہارا
یہ میری شکل کیوں تم سے بدلتی جارہی ہے
ابھی سے کیسے لوحِ دل کا ہر قصہ مٹا دوں
کہانی اک نہ اک اس کی سمجھ میں آ رہی ہے
در و دیوار کا بھی رنگ بدل کر دیکھ لینا
طبیعت خواہ مخواہ کیوں اس قدر گھبرا رہی ہے
یہ کس کی آہٹیں ہر شام دل سے کھیلتی ہیں
یہ کن پرچھائیوں میں چاندنی الجھا رہی ہے
وہ جس نے سی لئے لب، اپنے آنسو پونچھ ڈالے
اسے یہ دنیا کیوں شکوے پہ اب اکسا رہی ہے
محبت میں کہاں کا فلسفہ اور کیسی منطق
غزل میری حدیثِ عشق بنتی جا رہی ہے
۔۔۔۔۔۔۔۔۔۔۔۔۔۔۔۔۔۔۔۔۔۔
کیا کہیں اس دل کو کیسا مرحلہ درپیش ہے
آنکھ میں آنسو نہیں اور سانحہ درپیش ہے
پھر کسی منصور کو ہے شوقِ حق گوئی یہاں
پھر وہی دار و رسن کا واقعہ درپیش ہے
پھر کہیں دریاؤں پہ پہرے بٹھاتا ہے کوئی
پھر کسی کی پیاس کو اک حادثہ درپیش ہے
میرے اس کے بیچ کوئی رابطہ باقی نہیں
معنیٔ بے لفظ کا اک سلسلہ درپیش ہے
راستے مسدود ہیں یاں رہروانِ شوق پر
اور سفر نا آشنا کو راستہ درپیش ہے
کیوں نہیں مٹتی ہیں جسم و روح کی یہ دوریاں
خود سے ملنے میں یہ کیسا فاصلہ درپیش ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چلو کسی کی محبت میں اتنا کام ہوا
کہ حسرتوں کا بھی دل میں کوئی مقام ہوا
تو آسمانِ محبت کا وہ ستارہ تھا
جسے بجھا کے یہ سمجھے سفر تمام ہوا
پھر اس کے بعد رہے بے قرار ہم بھی بہت
وہ پربریدہ جو مشکل سے زیرِ دام ہوا
ہم اپنی جاں تو تمہیں نذر کرنے والے تھے
بھلا یہ کس لئے مقتل کا اہتمام ہوا
نہیں ہے تو پہ محبت میں جان دینے کا
سلیقہ جو کبھی رائج کیا تھا، عام ہوا
یہ کیسے راز کھلے دل کی آزمائش کے
کسی کی یاد میں جینا خیالِ خام ہوا
اڑا اڑا کے تو ہارے قفس سے ہم بھی مگر
عجب پرند ہے ہر پھر کے جو غلام ہوا
۔۔۔۔۔۔۔۔۔۔۔۔۔۔۔۔۔۔۔۔۔
اس شہر میں اب کیسے ہم اوقات گذاریں
پرچھائیں تری چنتے ہوئے رات گذاریں
پھر سڑکوں پہ آوارہ پھریں خوف کے مارے
تنہائی کے جتنے بھی ہیں درجات گذاریں
لمحوں کے تعاقب میں ملی ہیں کئی صدیاں
اس آبلہ پائی میں سما وات گذاریں
اب خود پہ بھروسہ ہے نہ دنیا پہ یقیں ہے
جس طرح ہمیں چاہیں یہ حالات گذاریں
زنجیریں کھنکتی ہیں تو کس کو ہے تعجب
آخر کوئی صورت یہ خرابات گذاریں
