شہناز نبی(کلکتہ)
گمشدگی
وہ شفاف راہیں
کہ جن پر نفاست سے رکھتے تھے پاؤں
خذف ریزوں سے یوں اَٹی جا رہی ہیں
سوالوں کا اک سلسلہ ذہن میں
خود سے خود کے لئے
نگاہوں کی وہ گفتگو
اب تو پارینہ قصہ ہے کوئی
دھڑکتے ہیں دل
سنسناتا کہاں ہے بدن
خواب کی ساری اَن چھُوئی کلیاں
مسل کرکوئی رکھ گیا
زیرِ بالش کہیں
جس نے پگھلے ہوئے چاند کو
موریوں میں بہایا
اسے شکوۂ تیرگی ہے تو کس سے
ستاروں سے اپنی قبا تم سجاؤ
کہ سورج کو بانہوں میں بھر لو
سمندر کی تہہ میں
جو پتھر کی صورت کہیں گر پڑا ہے
اسے کون ڈھونڈے۔۔؟
۔۔۔۔۔۔۔۔۔۔۔۔۔۔۔۔۔۔۔
میں کیوں مانوں
میں کیوں مانوں
میرے سارے تِیر ہوا میں رستہ بھولے
آسمان پر جگمگ کرتے
تارے اک اک کرکے ٹوٹے
نرمیلی مٹی کی خوشبو؍پتھر میں پتھرا سی گئی ہے
میں کیوں مانوں
میرے کھیتوں کو اک آندھی چاٹ رہی ہے
میرے پاؤں کے نیچے دلدل
میرے سر پر کالا سایہ
میرے سورج چاند ہیں جھوٹے
میرا سیارہ گہنایا؍میری بستی گونگی بہری
چوپالوں کا راج ہے چوپٹ
میرا قبیلہ نامردوں کا؍میرا اک اک آنگن مرگھٹ
میں کیوں مانوں ایسا ویسا
میں کیوں ہاروں کھیل سے پہلے
میری رگوں میں گرم لہوکا رقص ؍ابھی تک تابندہ ہے
میرے ذہن میں سوچ کی لہریں
اب بھی لیتی رہتیں کروٹ
میرے دل میں دھڑکن زندہ !
۔۔۔۔۔۔۔۔۔۔۔۔۔۔۔۔
نیند کی ماتی
وہ نیند کی ماتی جس کی آنکھیں
شام ڈھلے نارنجی ہوتیں
آتے جاتے خواب انوکھے
پلکیں جس کی چھوتے رہتے
جس کی کھڑکی کے پردوں پر
چاند کا بھی سایہ نہ پڑتا
جس کے کمرے سے بچ بچ کر
سورج اپنا رستہ چلتا
جس کے آنگن چنچل چڑیاں
سرگوشی میں باتیں کرتیں
جس کے ذہن میں سوچ کی گرہیں پڑتیں
اور کھل جاتی تھیں
جس کے دل پر یاس کے بادل چھاتے
اور اُڑ جاتے تھے
اس کی آنکھیں پھٹی پھٹی سی
اس کا چہرہ بجھا بجھا
۔۔۔۔۔۔۔۔۔۔۔۔۔۔۔۔
جو کوئے یار سے نکلے
ہماری خواب گاہوں سے چرا کر لے گیا کوئی
طلسمی خواب کے جھونکے
وہ کفشِ پا
سفر کی کوئی شد بد بھی نہ تھی جن کو
نئے رستوں کی متلاشی
گریباں کی طلب
گردِرہِ منزل
کہ دامن چاک کے خواہاں
ابھی تک ریشم و اطلس کے پردے سرسراتے ہیں
گلِ داؤدی بھینی خوشبوؤں سے گھر سجاتا ہے
مگر شوقِ طوافِ کوچۂ جاناں کی یورش میں
بکھرتے جاتے ہیں زنداں
سمٹتی جاتی ہے سیڑھی
صحن کچھ گھٹتا جاتا ہے
