(Last Updated On: )
شرف حاصل ہوا جن کو حرم کی پاسبانی کا
ان ہی کی بستیوں میں شور کیوں ہے بے مکانی کا
بس اک چھوٹی جمیعت نے انھیں تسخیر کر ڈالا
بہت اترا رہا تھا رنگ درفش کاویانی کا
میں اپنے خاتمے کے موڑ پر پہنچا تو یاد آیا
وہ اک بچھڑا ہوا کردار تھا میری کہانی کا
غنیم وقت کو خواجہ سرا شجرہ دکھاتے ہیں
کنیزیں بھی لقب اپنا چکی ہیں روپ رانی کا
قصیدہ لکھنے والی روشنائی تحفتاً آئی
ذرا سا مسئلہ درپیش ہے آنکھوں کے پانی کا
کرم ہے ناقدین وقت کا دلشادؔ نظمی پر
یوں ہی ادراک ہوتا جائے گا لفظ و معانی کا
